admin
Mehleli Sibanda
ABANTU sebafa unembeza lovalo, imikhuba lamasiko sebakuthatha bakwetshata ehlombe bakujikijela elwandle lenkalweni zentaba ezikude, zona ezingumasithela.
Ukudla kwemfeni akudlelwa ukusutha, ngokokubamba ithumbu lokuxotsha iphango. Kuphakululwa kuthiwe sephu sephu ukwenzela ukuthi wonke umuntu ofikileyo athole.
Nxa ungasuthanga uyabe uzagcwalisela emzini wakho. Kuvamile lezinsuku ukuthola ingaba yisihlobo kumbe ngumuntu makhaza nje ozoncedisa, ufice eseziphakulele intaba yesitshwala, engagqize qhakala, akhohlwe ukuthi wonke umuntu kumele athole.
Ngiyangibone kanengi umngcwabo nxa usemakhaya kuza izihlobo labangane ezivela emadolobheni ehlukeneyo, mhlawumbe ngenxa yokuthi kujwayelekile ukuthi umufi aphelekezelwe ngokuhlatshwa kwezifuyo ezifana lenkomo lembuzi.
Bayidle ubusuku bonke abanye izicine isibahudisa, abuyele ngakibo umuntu esemdambiyana ngoba isihudo sesimthamula ufice lamehlo esewele phakathi angani yingcothu ewele phakathi kwegula.
Abanye ngabahlala insuku ezithile emfeni, elwisa ukuthi uzaze ahambe ukudla sekuphelile, ufice labanikazi muzi labosendo sebekhulumela indaba zabo ezibayeni bengafuni ukuthi uzwe imfihlo yasekhaya. Funda ukuthi ngemva komngcwabo bhekisa amabombo akho kini, njalo ungakwenqami ukuthwala loba kuyini okuhwabileyo emfeni ngoba uzazithezela olulofezela. Abanye ngabathanda ukukhuluma amagama azwisa abafelweyo ubuhlungu, bakhohlwe ukuthi kumele balolonge amazwi abo agcwale intokozo lenduduzo.
Ayixabene.
Ungaxhumana lomlobi ku 0714355641.
Online Reporter