admin
UTHOLAKELE wayelejaha lakhe ayeliqome besafunda izifundo zeNyuvesithi. Bathembisana izulu lomhlaba njalo bahlonipha lesinqumo ababesenzile ukuthi ngeke baze bahlangane emacansini bengakatshadi, phela babehlukene bobabili laba lenengi lentsha yalamhlanje.
Abalamuhla umuntu wakhona angathunywa ukuyathenga isinkwa emavinkilini ahlangane lejaha limqomise uvele alembulele izidwaba, abadala belinde isinkwa sokuphuzisa uhololo, balinde uhololo aze aphole.
Lababalisi babo babebathanda bebathandela inhlonipho njalo bekhuthele ezifundweni zabo, lomfundisi wabo wayethi nxa enika umzekeliso anike ngabo ngoba ebona ukuthobeka kwabo, kwathi ngokuhamba kwesikhathi sebeqedile ekolitshini ijaha likaTholakele laphuza ukuthola umsebenzi, yena uTholakele waba lenhlanhla yamaSwazi ngoba wathi ephuma emnyango wekolitshi engena emnyango womsebenzi.
Wathi esethole umsebenzi yaqala ukungena impehlane ethandweni lwabo, wayebona labangane ayesebenza labo belethwa emsebenzini ngemvava zemota ezibhabhule amasondo.
Bamyenga abangane bethi umusa ngaphi uqhwayilahle usobhuku wabolova, wayesedingelwe omunye umaqhuzu wenye inkampani esedolobheni lakoBulawayo, njengesikhulu samthengela imota eyohlobo lwenana iHonda Fit.
Yatshaya inhlinziyo yakhe, kuthulisele cwaka wawungayizwa ithi bhu bhu ngoba wayekwazi ukuthi akwenzayo sequma izinqumo abazenzayo kodwa aziduduze ngokuthi lelikhehla lakhe lilemali.
Labangane bakhe bemnika isibindi, lakanye wacina etshela ijaha lakhe ukuthi uhambo lwabo kwezothando luphelile, wazama ujaha ukuthuma abantu abambalwa ukuthi bayemncengela kodwa wephulela izigodo endlebeni ethi eyakhe inhlinziyo ingafulathela ayinyemukuli.
Ye wayekhombe ikhehla elilemali kodwa kasadingisisanga imbali yalo, laselifelwe ngamakhosikazi amathathu njalo besifa bemathambo thambo kukhanya ukuthi badliwa yisifo sengculazi, lalo lalizikhanyela ikhehla lenkosi ukuthi liphila ngamaphilisi ngoba lalivuthiwe ebusweni sekungani yihloko yembuzi evundileyo.
Ngenxa yokuthi wahle waphandlwa ngumfasimba wokuthanda imali kazange esanaka lutho, akuphelanga nsuku ngaki ehlangane lalubaba emacansini wezwa umzimba wakhe kungaseyiwo awaziyo, ngokuhamba kwesikhathi waya kubodokotela bahle baqala ngokumhlola igazi, bathola ukuthi igazi lakhe selingcoliswe ligcikwane lengculaza.
Waqala ukukhumbula ijaha lakhe elaselitholile umsebenzi kwenye inkampani eyahle yathi kumele ayesebenzela kweleBotswana ngoba kufuneka umuntu olemfundo elingana leyakhe, wakhala ezimathonsi uTholakele esezama ukuncenga ijaha kodwa yayisiwuchithile umuthi inkonyane.
Ayixabene.
Online Reporter