admin
Khanyile Ndebele
INHLANGANISO yeAgritex isikhuthaze abalimi ukuthi balime isilimo se-garlic esiluziko kumpilakahle yabantu njalo esithandwa ngabanengi esitshebeni.
UNkosikazi Treggy Mpofu ongumlimisi koBulawayo kunhlanganiso ye-Agritex uthe i-garlic yisilimo esilinywa kusukela ngenyanga kaNhlolanja kusiya kuNkwenkwezi ngoba kayifuni kutshisa futhi ifuna lomhlabathi osemanzi.
Uthe olima i-garlic angayifaka emfolweni okumele yehlukane nge-8cm kusiya ku-15cm besekusithi imfolo yona yehlukane nge-30cm kusiya ku-40cm,” kutsho uNksz Mpofu.
Uqhubekele phambili esithi kungasetshenziswa ama-clove ukuhlanyela i-garlic.
“Nxa ungahlanyela i-garlic ulakho ukufaka umvundiso weCompound C ongaba yi-600kg kuhekitha yinye ngayinye.
“Ngemva kwamaviki amabili kusiya kwamathathu isilimo sesihlumile, umlimi kufanele afake i-Ammonium Nitrate.
Uthe umlimi angathelela isilimo lesi esebenzisa ama-sprinkler loba i-drip irrigation.
“Nxa umkhathi utshisa kakhulu kutsho ukuthi kufuneka amanzi abe manengi. Okunye njalo umlimi kufanele afake amahlamvu azasebenza ukugcina amanzi phansi,” kutsho uNkkz Mpofu.
Uthe isilimo lesi sandise ukuhlaselwa yizibungwana ezigoqela i-cut-worm edinga ukuthi kusetshenziswe umuthi weThionex loba izibungwana ezibizwa ngokuthi yi-thrips ezifuna ukuxotshwa ngeMalathion.
“Imikhuhlane ejwayele ukuhlupha isilimo se-garlic yi-Alternaria le-Downy mildew engalwiswa ngomuthi weDithane,” kutsho uNkszn Mpofu.
Uphethe ngokuchazela abalimi ukuthi i-garlic nxa isivuthiwe iyaphenduka umbala.
“I-garlic ivunwa nxa amahlamvu esetshintshe umbala waba lithanga ngoba ingavunwa isikhathi singakafiki iyabe ingakavuthisisi okutsho ukuthi ama-cloves awo ayabe emancane kukanti ingaphuza ukuvunwa iyabankulu kakhulu, iwome njalo yehlukane ngakho umlimi kufanele aqaphele lokhu,” kuphetha uNksz Mpofu.
Online Reporter