admin
Mehleli Dube
KUVAMILE ukuthi ekhaya intombi ingoniwa ngumuntu, mhlawumbe engamqondi kuhle, kumbe lelo jaha lingafunwa ngenxa yezizatho ezitshiyeneyo, kuzalwe umntwana ozaphiwa amagama okunengisa afana laboDingabakibo. Ngoba engumntanentombi uphathwa ngochuku ngoba kukhwitshizwa ukuthi uyise kaziwa lapha ekhaya njalo zingekho ezamabheka ezakhitshwayo.
Yonke impazamo enziwa ngunina ayetshathiswe umntwana engone lutho njalo engazi lutho. Nxa kuyilaba abafuyileyo lesikolo uphange ekeliswe atshone eselusa, osowabo besiya esikolo, bafunde ngazo ezeluswa ngumzukulu.
Phela abanye bayabe sebethole isigqili asebenze engaholi lutho, kweminye imizi njalo athi esezelusile zanda bamkhombe indlela angayaziyo ukuthi iqonda kobani, bethi kayedinga abakibo, khona angaba lomnyama unina atshone engamtshelanga ngomkhondo kayise, uzaze awukhombe olotshwala.
Eqinisweni ikhaya ayabe elazi yilo lelo akhulele kulo, yikho nje abanye abazukulu bevuka ukeketani esefuna imbadalo yokunakekela impahla yalapha ekhaya, abalapho besiya esikolweni, abanye baze bakhohlwe loba sekusatshiwa ilifa bangamuphi ngitsho leyodwa eyomuthi, kodwa enguye owenza zagcwala isibaya ngokuzelusa, uzwe bethi laye hantsho eselusa wayesidla amasi, pho-ke sefuna ukuphiwelwani.
Kungaba libhizimusi uzabe ethunywa ukuyathenga okuswelekayo kumawuluseli, angaphiwa thuba lokuphumula lokuya loba ku-night school. Bathi sebebona ukuthi into sezihamba kuhle njalo lebhizimusi liyaqhela bamjikele enkangala, aphenduke isimbamgodi singawulali sona isambane.
Lolu lulunya oluphindiweyo, xwaya ukuthi kazilethenga emhlabeni njalo nxa usenelisa menzele imfanelo zonke okumele zenzelwe umntwana, ulaka lolunya lwakho uzolwethesa uyise mhla ethi sezofuna umntanakhe, ubusumgweba-ke.
Laye nxa umzukulu umphathe ngesandla esiphuphuma ngothando, mhla ethi uyodinga uyise uzavalelisa akubonge, loba empilweni engaba ngumaqhuzu ngeke akukhohlwa loba esesidla izankefu ngesikhathi sehlobo.
Ayixabene. 0714355641
Online Reporter