admin
Wayne Ncube
ABALIMI baxwayiswa ukufuya izifuyo ezincane ngoba kazihluphi njengezifuyo ezinkulu njalo zifuyeka loba izulu lingaba lilutshwana.
Ekhuluma lentatheli uMnumzana Paul Nyathi onguLivestock Specialist kunkampani yeAgrivet koBulawayo ubike ukuthi izifuyo ezincane njengezimvu, imbuzi azihluphi ukufuya njalo lokudla kwazo akuduli kakhulu njengokwenkomo
“Okokuqala izifuyo ezincane azidingi ndawo enkulu. Sungafuya imbuzi ezinengi endaweni encinyane kodwa inkomo zifuna inkalakatha yendawo ukuze zifuyeke kuhle. Ukufuya izifuyo endaweni encane kwenza kubelula njalo ukuzikhangela lokuzivikela,” kuchaza uMnu Nyathi.
Uqhubeke esithi izifuyo ezincane ubuhle bazo yikuthi ziyaphangisa ukwanda ukwedlula inkomo.
“Izifuyo ezincane azilutho ukuzalana zande njalo ziyaphangisa ukukhula ngakho kwenza inzuzo ibenengi ngesikhathi esifitshane kumlimi ngoba ibhizimusi lakhe liyabe liqhela ngokuphangisa. Imbuzi ilakho ukuzala amazinyane amabili loba amathathu ngasikhathi sinye kodwa inkomo izala ithole elilodwa okwenza izifuyo ezincane zande ngesikhathi esifitshane.
“Izifuyo ezincane ziyafuyeka kuhle lanxa izulu lingekho ngoba azidingi kudla lamanzi amanengi njengenkomo,” kuchaza uMnu Nyathi.
Uphethe ngokuthi abalimi bangaqhubeka befuya inkomo kodwa kumele zingabi zinengi.
“Umlimi nxa efuna izifuyo ezinjengenkomo kumele abone ukuthi azibi zinengi ukwedlula izifuyo ezincane ngoba zona kulula ukuzifuya,” kuphetha uMnu Nyathi.
Online Reporter