Online Reporter
IZOLO bekuthi ijaha nxa selijwaqile seliphume ebubhungeni seliyindoda beliqoqa izimali kumbe izifuyo eliyabe lifuna ukuthi liyelobola ngazo.
Belitshengisela njalo lokuthi lizimisele njalo lentombi liyithandile, ungakhangela osekusenziwa ensukwini zalamhlanje ungathi mhlawumbe kudlalwa amadlwane.
Ngikhumbula omunye ujaha owathatha umzawami ngokumithisa, laye wathi esezibona ukuthi usekhulelwe wahle wamukela kibo kajaha basebethumela idombo ukuthi lizositshela ukuthi umntanabo usefohle umuzi yingakho sidingele ngakibo.
Kwaqoqwa ilanga lapho okwakuzabuya khona umkhwenyana lequla lakwabo, sathaba ngoba sithi ngalelo langa sizakudla ezimnandi nanku phela kuyabe kukhitshwa izimali zokoniwa komzawami, kanti asibuzanga elangeni.
Bafika abantu benkosi bezihambela ngenyawo bahlangabezwa ngomunye wabobabakazi wahle wabasa exhibeni lapho okwakuzakhulunyelwa khona.
Isikhathi esinengi nxa uzolobola kumbe uzokhupha izimali kobabazala lawe kuyamele utshengisele ukuthi uyindoda ukuze bangakudeleli, abanye baze baboleke lemota kubangane besenzela ukuthi kube lesithunzi.
Ngahle ngayifunda ivaliwe ngibona isicathulo somkhwenyana sitshekile ngezwa ngifikelwa yikwesaba ukuthi mhlawumbe lababantu abaphathanga lutho.
Lakanye sathi siqalisa ukukhuluma lindaba singakayikude bahle bakhalaza bethi sesijunqule umsundulo abaselamali bacina kukangaziwe. Bahle bakhuza babaza bethi umkhwenyana wayesanda kuqala umsebenzi okunye okufunekayo kuzaphela kubuye.
Ungananzelela lenzinsuku banengi abacina ngokukhipha ukangaziwe ahambe mlibe umuntu ngoba phela uyabe esesaziwa ngokusemthethweni wemuli ukuthi usengukhwenyana wabo, lokuthi ngokuhamba kwesikhathi ukuthi alungiselele umtshado kumbe ukuyaqedisa amalobolo kabasazihluphi, inengi labo bazala baze baqede ithumbu kungela lutho olukhitshiweyo.
Yikho mhlawumbe eminye imihlobo efanana labavela empumalanga mzukwane kuthe kwehla ifu elimnyama abesedlula emhlabeni bakhalala isidumbu nxa kungakhitshwanga uthole imuli sezixabana. Ayixabene!
Mehleli Nkunziyembongolo Dube
