adminCornelius Luphahla
KULENDODA yesigabeni seMaphaneni eNkayi exotshwe ubusobhuku ngoba sihluphile ngokubanjwa lamakhosikazi abanikazi osokudale ukuchitheka kwemizi eminengi kule indawo.
Usobhuku lo, uLameck Magagula uxotshwe kubukhokheli bomdabuko ngabanye osobhuku lezakhamizi ngemva kokubanjwa lamakhosikazi amahlanu amanye amadoda.
Kuzwakale ukuthi amanye amadoda alamakhosikazi abanjwa losobhuku ahle ehlukana lamakhosikazi awo ethi ngeke akumele lokhu ngoba usobhuku lo engawahloniphi.
UMthunywa uxhumane loMnumzana Edwin Ndlovu waveza ukuthi uMagagula ulomuthi awusebenzisayo ukuze athandwe ngabesifazana.
“UMagagula ulomuthi wokuthandwa ngabesifazana yikho ehlala ebanjwa lamakhosikazi abanikazi. Ngitsho ngoba kalalutho esingathi lulandwa ngabesifazana njalo ubusobhuku lobu ngeke babulande.
“Isimanga yikuthi amanina la abanjwa lawo uyawathuka emphakathini kodwa ale emthanda kunjalo ngapho esazi ukuthi athandana laye emanengi njalo ethethe. Lokhu kusuka kuveze sibili ukuthi kukhona alakho okokudonsa amakhosikazi abantu uMagagula,” kutsho uMnu Ndlovu.
UMnumzana Jacob Zikhali omunye wamadoda achithelwa umizi ngusobhuku lo uthe yena wehlukana lomkakhe ngenxa kasobhuku lo.
“Mina uMagagula ngiyamzonda ngoba ugangile wangehlukanisa lomkami. Ngitsho ngoba ngathi ngemva kokubathola belele emzini wami bayathonisiswa kumlisa uMagagula wabhadala inkomo. Kuthe kungakapheli iviki ngabathola njalo bebonke esinangeni.
“Lokhu kwangicaphula kakhulu ngahle ngabona ukuthi umkami litshapha njalo kasoze ehlukana loMagagula.
Yikho-ke okwadala ukuthi sihle sehlukane, asazi kumbe uMagagula ngokukhipha inkomo wahle wakubona njengokumlobola,” kuveza uMnu Zikhali.
Ekhuluma loMthunywa uNkosazana Silibaziso Tshuma omunye wamakhosikazi abanjwa loMagagula uthe kakwazi ukuthi wayengenwe yini aze athandane losobhuku yena endile njalo waxolisa kumkakhe.
“Mina kangikwazi ukuthi ngasuka ngangenwa yini ngize ngithandane losobhuku ngapho ngendile. Lokhu kungizwisa ubuhlungu kakhulu njalo umkami ngamxolisa lakhathesi lokhe ngimxolisa ngoba laye uzwa ubuhlungu.
“Sengize ngifisa ukuthi sithuthe kule indawo siyekwakha khatshana ukuze umkami akholwe ukuthi sengehlukana loMagagula,” kutsho uNkszn Tshuma.
Ebuzwa ngale indaba uMnu Magagula uvumile ukuthi yenzakala wathi kodwa kalamuthi, amakhosikazi abantu ayazibuyela nje.
“Kuliqiniso ukuthi ngabanjwa lamakhosikazi abantu kodwa kangisebenzisi muthi mina, amakhosikazi abantu ayazibuyela nje. Lokhu kangikuthandi lami ngoba khathesi sokungixotshise ubusobhuku. Ngalokhu kangikwazi ukuthi kuyabe kuhambe njani ngizibona sengikwenzile kuphela,” kutsho uMnu Magagula.
Usobhuku omkhulu wakule indawo uMnumzana Danisa Ncube ubikele uMthunywa ukuthi indaba enjalo yenzakala ngoba usobhuku lo ubeseqede imizi yabantu.
“Indaba yokuthi uMagagula sammisa ukuba ngusobhuku liqiniso ngoba ubeseqede imizi yabantu eyichitha.
Ngalokhu-ke ngeke akhokhele abantu ngoba ugangile,’ kuphetha uMnu Ncube.
Online Reporter