admin
KWAKUTHI mhla kufika umalukazana ekhaya kujatshulwe kuhlatshwe kulalwe ngesibomvu, kusaziwa mhlophe ukuthi yikuqhela komdeni, phela wayekhungwa engabonwa mahala nje.
Abalendibilitshi babephosela yona njalo abalezifuyo kungaba yinkukhu kumbe imbuzi loba yini azayisebenzisa ekwendeni kwakhe. Uninazala wayethaba ngoba ekwazi ukuthi usephunyuziwe ejogweni lokupheka lokukha amanzi kanye lokugezisa izitsha.
Wayesenza imisebenzi yonke eyenziwa ngabesintwana andubana atshayelwe ihlahla lomkakhe. Phela wayetshayelwa ihlahla esekhanya ukuthi ubunzima beguma angabumela.
Lamhlanje bathathana bayehlala emadolobheni bakhohlwe ngokwekhaya, abanye baze bakhumbule ekhaya esethethe umhlalaphansi. Bahamba banyamalale kwesinye isikhathi kuze kulamule imfa, lakho kube ngeyesihlobo esiseduze, labazukulu bangavunyelwa ukuvakatshela ugogo lokhulu ngoba kuthiwa bayaloya, sithwale nzima isalukazi seNkosi ngokukha amanzi, lokuyatheza inkuni sengani asizalanga, bona bezihlalele emadolobheni bakhohlwe ukuthi imizimba yabantu asebempunga akusamelanga isebenze kanzima sekufuna nje basetshenzelwe ngoba bengacabangi kakhulu njalo bahlale bejabulile ukuze bangahlaselwa yizifo ezifana laboBP kumbe umkhuhlane wetshukela.
Ngangibona intombi ezala mina yona engasekho emhlabeni, kwakuthi ngingahlaba ikhefu ngithwale imuli yami loba ngithole kuthiwa uyatshisatshisa wawuhle ubone esemoyizela etshengisa ukuthi ujabulile ahle aphole, lokungabazukulu kumbuza imibuzo engapheliyo, kukhomba ukuthabela ugogo wabo.
Namhlanje inengi labazali sekwathiwa bayaloya batsholobele edolobheni, abazali besidla luklubhu emakhaya.
Ayixabene.
Umlobi ungamthinta ku: 0714355641
Online Reporter