admin
UMUNTU ongumama ukhangelelwe ukuthi abengumuntu othobekileyo, olothando, olenhliziyo ende, ozihloniphayo njalo olesineke. Kunengi esingakutsho ngokukhangelelweyo emuntwini ongumama kodwa kulezinsuku sinanzelela ukuthi abesifazane sebeguquke ngendlela ezesabekayo.
Abaselayo imbeko, abasazihloniphi bona ngokwabo njalo sebephila impilo ngendlela abayifunayo, asazi kumbe yimpucuko le eseyasivelelayo kodwa okusemqoka yikuthi umama walamuhla utshiyene kakhulu lowendulo.
Akusamangalisi ukuzwa ngokungaziphathi kwabomama kulezinsuku njengoba sisizwa indaba ezitshiyeneyo mihla ngemihla.
Okuyisimanga kakhulu kulezinsuku yindaba esizizwa ngamanina angasela ngitsho lonembeza nanko phela asethengisela abantwana izidakamizwa, amanye akhona ngadlwengula abantwana, amanye njalo kubikwa ukuba asehamba ezindlini zabantu afike edinga indawo yokulala kanti ayabe nje ethi lala lulaza sikwengule nanko phela uyabe ehamba labanye abathi phakathi kobusuku bavule batshontshe impahla zabanikazi badliwe ngumswenya.
Habe! Kungabe kubangelwa yini lokhu, kambe umuntu ongumama aze azehlise isithunzi ngokwenza into enjengale?
Akwaziwa ukuthi kungani besenza kanje omama laba kodwa sesizwe indaba ezinengi ngabo njalo kuletha usizi endlebeni zabomama abanengi ukuthi sizwe ngamanina la asebengamahlongandlebe emphakathini. Abanye bathi omama abenza kanje bakwenza ngoba kubanika imali.
Okunye njalo okudanisayo ngomama bakulezinsuku yikuthi sebekutshaya indiva ukudala amacala atshiyeneyo, sizwa nsukuzonke ngomama kuthiwa babulele abantwababo, batshontshile ezitolo njalo balwa labomkabo emphakathini. Kambe yikuziphatha bani lokhu kwabomama. Kuyayangisa lokhu njalo kwehlisa isisindo somuntu ongumama emphakathini.
Amantombazana la abulala abantwababo nsuku zonke labo bangesinye isibonelo esitshengisela ukuthi umuntu ongumama akaselalo uzwelo lothando kulezinsuku. Kambe umuntu angathi ephethe inkonyane yakhe okwesikhatshana abesezitshela ukuthi uzayibulala, kubizwa kuthiweni lokhu?
Kuqakathekile-ke ukuthi omama babumbe inhlanganiso ezizafundisa ikakhulu amantombazana ngokuqakatheka kokuziphatha ngoba beyibo omama bakusasa. Inhlonipho, ukuzithoba, ukuba ngumuntu olesithunzi njalo olozwelo yikho kanye okudingakalayo emuntwini ongumama. Ukubambabamba kwabomama lokhu osekukhona kulezinsuku kumele kuphele. Omama kumele bazihloniphe ukuze bazi ukuhlonitshwa ngabanye abantu. Akusizi lutho ukuthi umama aphume aye ebhawa ayenatha utshwala adakwe aze azikhohlwe ukuthi ulinina elakhileyo.
Ngubani ozakhulisa isizwe nxa omama sebezilahla ngalindlela? Angithi bayatsho abantu ukuthi umuzi uyilokhu oyikho khona ngenxa kamama. Umuzi olomama oqinileyo njalo ohloniphekayo uba ngumuzi ohawukelwa yiloba ngubani kodwa umuzi ophethwe linina eliyisidakwa, ihlongandlebe elehluleka khona ukuziphatha umane utshabalale njalo labantwana abaphuma emzini lo basuka babe ngenye into emphakathini. Kungaba kuhle nxa umama munye ngamunye angazi ukuthi ngaphandle kwakhe isizwe siyatshabalala, ngakho-ke kumqoka ukuthi aziphathe, azihloniphe njalo ahloniphe abanye.
Online Reporter