Online Reporter
Innocent Kurira
BADANILE abaphila ngomdlalo wokugijima kulandela ukuzwa ukuthi umjaho omkhulu kuleli owePPC Matopos 33-Miler kawukho lonyaka.
Umgcinisihlalo weBulawayo Athletics Board (Bab) uWatson Madanyika uthe abasekela umjaho lo ngemali bamcebise ukuthi lonyaka ngeke bawuqhube lumjaho ngezizatho ezithile.
UMadanyika kazange esachasisa ukuthi yiziphi lezo zizatho. Lesi isinqumo sitshengisa ukulahlekelwa okukhulu emphakathini ophatheka kumdlalo wokugijima, njengoba i-PPC Matopos 33-Miler ibalelwa kumijaho emikhulu ehlala ilindelwe elizweni.
UMadanyika uzwakalise ukuphoxeka kwakhe, egcizelela ukuthi labagijima amabanga amade kuleli baphoxekile.
“Lo ngomunye wemijaho yethu emikhulu. Siphoxelike ukuthi ngeke sibe lawo lonyaka. Kubuhlungu kakhulu kwabagijimayo abakade bewubheke njalo bewulungiselele umnyaka wonke. Abaxhasi bethu baveze ukuthi abenelisi ukusixhasa. Kodwa-ke, silethemba lokuthi umjaho uzabuya ngomnyaka ozayo,” kutsho uMadanyika.
Ngomnyaka odluleyo kwanqoba uProsper Mutwira kuhlandla labesilisa owatshaya intambo ngemva kwamahola amathathu, imizuzu eyisithupha lemizuzwana eyisithupha. Kuhlandla labesifazane kwanqoba uChiedza Chokore eqede ngemva kwamahola amathathu, imizuzu engamatshumi amane lanhlanu, lemizuzwana eyisithupha.
Kumahlandla la, abanqobi bathole imvuzo yemali. Owokuqala waphiwa iUS$2 000, owesibili uthole i-US$1 300, owesithathu US$600. Ngaphandle kokugijima umango we-53,1KM, bakhona abaphatheka kumbango ye-21KM, 10KM, 5KM kunye lomncintiswano walabo abahamba ngama-wheelchair.
Umjaho lo wasungulwa ngo-1963. Sekuncintise intshantshu zakuleli lezinye ezilodumo ezivela kwamanye amazwe. Obekwenza ukhwabithwe linengi yikuthi ubusekelwa ngemali ephezulu lokuthi kugijinyelwa endaweni ethandwa yizivakatshi entabeni zeMatobo, eMatabeleland South.
Kuvame ukuba labagijimayo abangaba yi-4 500 umnyaka ngomnyaka.
