Online Reporter
Nkosilathi Sibanda
ABASAKHULAYO kuleli sebebike ukuba balesibongo esikhulu abasethula kubadala labazali abakhetha ukuya lwisana labelungu egangeni, kudingwa uZibuse wabantu abaNsundu.
Abatsha baveze ukuthi kungayisikho ukuthi abadala bathatha izikhali bangena ehlathini, ngabe amathuba empilo angcono kawakho kuleli.
Mhlaka 18 Mabasa ilizwe lifikisa iminyaka engamatshumi amane lanhlanu kaZibuse. Lonyaka umcimbi omkhulu uzabe useGokwe, eNkabazwe yelizwe.
Esabelweni seMatabeleland South, abantu bazabuthana edolobheni lePlumtree. AbaseMatabeleland North, bazangena umgwaqo beqonde eTsholotsho.
Umgcinisihlalo wabasakhulayo kubandla elibusayo, iZanu-PF, esabelweni seMatabeleland South, uKhomuredi Moses Langa wethule umbiko wokuthi lesi yiso isikhathi lapho abasakhulayo okumele basukumele phezulu, bebonge abadala ngoZibuse.
“Sithanda ukubonga uHulumende wethu ngomsebenzi awenzayo. Sibonga uZibuse esamthola kuminyaka engamatshumi amane lanhlanu edluleyo.
“Njengogatsha lwabasakhulayo ebandleni elibusayo, kunengi esifuna ukukubonga, esakwenzelwa ngabadala loHulumende wethu. Sibonga kakhulukazi amathuba ezemfundo. Khathesi, ngemva kweminyaka yonke le, sibona sekulezikolo kuma-ward onke elizweni. Siphinde sengeze isibongo ngokwakhiwa kwamakilinika lokutholakala kwenhlelo zempilakahle kazulu emaphandleni. Ngesikhathi sombuso wabelungu kwakungekho konke lokhu,” kutsho uKhmrd Langa.
UKhmrd Langa uthe abasakhulayo kabafunde ukuthanda lokukhwabitha ukusebenzela ilizwe.
“Kumalanga adluleyo uHulumende usungule uhlelo lwesikhwama sokuphathisa abasakhulayo abafuna ukuvula amabhizimusi. Kuloluhlelo njalo olwe-Youth Service lapho uHulumende avule khona amathuba wokuthi abasakhulayo bafunde ukusebenzela ilizwe, ukwazi ngembali yakuleli, amasiko lezepolitiki lokuthi benelise ukuvikela ilizwe. Konke lokhu kuze ngenxa yokuthi siyazibusa.”
