admin
Khanyile Ndebele
UHLANGOTHI olubona ngempilakahle yezifuyo eyeLivestock Production Development kunhlanganiso ye-Agritex soluxwayise abafuyileyo ukuthi baqaphele umkhuhlane we-foot rot ohlasela izimvu lembuzi ngesikhathi sezulu.
UMnumzana Addmore Chikohwa onguPrincipal Livestock Officer kunhlanganiso ye-Agritex uthe, umkhuhlane we-foot rot uhlasela izimvu lembuzi ngesikhathi lesi esezulu ngoba kuyabe kugcwele amadaka esibayeni.
“Okubangela umkhuhlane lo yikuthi izifuyo ziyabe zesinyathela amaxhaphozi kanye lokuhlala ezibayeni ezilamadaka okwenza amasondo azo abe buthakathaka, lokhu kuvumela amagcikwane ukuthi angene phakathi kwamasondo.
Amagcikwane la agoqela iBacteroides Nodous, Fusobacterium leNecrophorum aphambanisa lapho okungena khona ukudla.
“Okutshengisa ukuthi izifuyo sezihlaselwe ngumkhuhlane lo yikuthi ziyabe seziqhula unyawo olulodwa loba zonke, sezisidla zihleli ngamadolo, sezilobuvila bokuhamba, zingaba loqhuqho, umzimba wehle ngenxa yokungadli kuhle.
Uthe abalimi bezifuyo bengavikela umkhuhlane lo ngokwekela ukuhlalisa izifuyo zabo ezibayeni ezigcwele amadaka.
“Sikhuthaza abalimi ukuthi kufanele bafulele izibaya zabo njalo bakhweze izibaya zabo okuzavikela ukuthi izifuyo zabo zime edakeni iloba okugcwele khona amanzi.
“Nxa izifuyo sezilomkhuhlane lo, zingelatshwa ngokuzidibhisa inyawo ku-copper sulphate solution, i-zinc sulphate solution iloba i7% iodine solution.
Uphethe ngokuthi nxa sezinikwe imithi le ziyabe sezimele zisuswe edakeni zihanjiswe lapho okome khona njalo baziphe ukudla zize zibengcono.
Online Reporter