admin
Cornelius Luphahla
BEKUSINDWE ngobethole kusukume ngitsho lesiledolo kudili lokuvulwa kwesitolo sesinye isakhamuzi sakoGodlwayo esigabeni seMzingwane ngempelaviki.
Kudili leli bekungasibantu kuyinyelane mhlaka 27 Ncwabakazi lapho uMnumzana Gallet Masuku Mabhena abelomkhosi wokuvula isitolo iDungindaba General Dealer and Bottle Store okuyisitolo sakuqala kule indawo.
Ekhuluma lentatheli uMnu Mabhena uveze ukuthi okwenza wakha isitolo lesi yikuthi bekungelamavinkili kulindawo njalo ukhangelele ukuthuthukisa intsha nxa isitolo sakhe siphumelela.
“Okwenza ngakha isitolo kule indawo yikuthi izakhamizi bezihamba umango omude kakhulu zisiyathenga impahla ezehlukeneyo. Lokhu bekusenza ukuthi abantu balahlekelwe zimali ezinengi ngoba bebegada besiyathenga eSigodini kumbe koBulawayo.
“Ngikhangelele ukuthi isitolo sami singangilethela inzuzo ngizaqhubekela phambili ngincedisa ontanga ikakhulu kwezemidlalo yenguqu noma nje ngibancedisa kokunye kulezinsuku.
“Ngizabaphathisa njalo ukuze abafana benelise ukubonakala kwamanye amaqembu ezenguqu angabaphakamisa njengeHow Mine,” kutsho uMnu Mabhena.
UMthunywa ukhulumisane loNkosazana Rozzie Dube umkaMnu Mabhena wachaza ukuthi okwenza benza idili leli yikuthi babethakazelela ilanga lokuzalwa kukaMnu Mabhena.
“Okwenza senza umdlalo lo yikuthi sasithakazelela usuku lokuzalwa komkami noma nje kwasekudlule ngosuku olulodwa. Okunye njalo sasisenzela ukuthi sijabule lozulu okunguye ozasixhasa ngokuthenga kulesisitolo.
“Njengoba nje sesivule isitolo kule indawo sikhangelele ukuthi sisungule amaphurojekithi atshiyeneyo azancedisa ontanga ngoba inengi labo lihlezi kalisebenzi,” kutsho uNkszn Dube.
UMnumzana Mfanele Masuku omunye wentsha yakule indawo ubikele uMthunywa ukuthi uzwa ejabula kakhulu ngoba idili leli liveze amathalenta atshiyeneyo kubontanga.
“Mina ngizwa ngijabula kakhulu ngoba idili leli liphakamise njalo lavuselela amathalenta atshiyeneyo nanko phela bekulamaqembu omdlalo kanobhutshuzwayo angu-16.
Lokhu kusichazela ukuthi amaqembu amakhulu sengathola abadlali esigabeni sethu okuyinto engasithuthukisa kakhulu.
“Okunye okusijabulisayo yikuthi abazali bethu abasathwali nzima besiyathenga impahla khatshana njengoba inengi labo selingabantu abadala njalo esikhathini esinengi bayabe bebodwa labantwana besesikolo,” kuphetha uMnu Masuku.
Online Reporter