admin
Ncekwenhle Ncube
ABALIMI bezabelweni zeMatabeleland bakhuthazwa ukuthi ekuqaliseni kwenyanga kaMpandula baqalise ukuqabanga emasimini abo ukuze kuthi kufika isikhathi sezulu bengathwali nzima.
Abalimi laba bakhuthazwe lokhu ukuze benelise ukuthola isivuno esihle njengoba umumo womkhathi usuguqukile.
Omunye umlimi wesigabeni seGwanda okhulume loMthunywa uveze ukuthi sebebone kulicebo elihle ukuqala ukuqabanga ukuze benelise ukuthi nxa izulu litshaya phansi labo sebefake izilimo phansi.
Ekhuluma lentatheli uNkosikazi Sibuke Dube uthe sebeqalisile ukuqabanga ukuze nxa izulu lifika libathole sebezilungiselele.
“Thina kithi eGwanda sesiqalile ukuqabanga. Senzela ukuthi nxa liqala ukusewula izulu lisithole sesilinde ukufaka inhlanyelo phansi.
“Kulezinsuku kunzima ukuthi ubekwazi isimo somkhathi. Selingaphangisa ukusewula izulu kube nzima ukuthi siliphumele njalo lokuqabanga kube nzima ngakho sikhethe ukuthi senze kusaselesikhathi,” kuveza uNkszn Dube.
Omunye njalo umlimi oseqalisile ukuqabanga uMnumzama Thokozani Ngwenya ongumlimi esigabeni seNkenyane uthe lesi yisikhathi esihle sokuqabanga ngoba abalimi bedinga isikhathi sokulungiselela amasimu abo.
“Lithuba elihle lokulima leli kanti njalo njengabalimi kuzasipha ithuba eleneleyo ukuthi senelise ukufaka umquba leminye imvudiso emasimini ethu,” kutsho uMnu Ngwenya.
Ukuqalisa khathesi ukuqabanga kuzasiza kakhulu izakhamizi ezingelazifuyo zokulimisa ukuthi nxa sekufika isikhathi sokulima zingathwali nzima kodwa zenelise ukuhlanyela kanye labalenkomo.
Ngaphandle kwalokho abalimi bayakhuthazwa ukuthi bathintane labalimisi ukuze babekwazi izilimo okufanele bazilime kukhangelwe isimo somkhathi lendawo abakiyo.
Online Reporter