admin
AMANINA esiqintini sePhakama indawo eseduzane leKomatipoort, eMpumalanga kweleSouth Africa ayaziqhenya ngabomkabo okubikwa abayiwa emabhodweni bapheka kuze kuvume lamanina onke esigabeni.
Amanina akulesisigaba ahamba ehlekelela nje ngoba omkabo bathakazelela ukupheka ezifela emlonyeni emkulwini.
Kodwa-ke ayisikho ukuthi amadoda la adliswa ngekorobela, ayakuthakazelela nje ukukwenza lokhu.
Amadoda la alitshumi ayaziqhenya ngokuba athathela omkabo isikhundla sokupheka njalo lokhu sokulenyanga eziyisikhombisa kusenzakala.
Kubikwa obaba laba bakhuthazwa ukwenza kanje nguBishop Sandros Sambo (67) webandla leGalilee Apostolic Church.
Amadoda azinikela ukuthi azabe epheka emizini ayo encedisana lamanina njalo athi akhuthaza amanye amadoda elizweni lonke jikelele ukuthi akwenze lokhu.
UBishop Sambo ubikele iphephandaba leDaily Sun ukuthi yena waqala kudala ukuphekela umkakhe labantwana.
“Ngipheka nsuku zonke endlini. Lokhu angikwenzi ngoba ngijayeza umkami nje ngikwenza ngoba ngiyamthanda kodwa okumqoka yikuthi angakhohlwa ukuthi yimi ubaba walumuzi.
“Akulandawo lapho okulotshwe khona ukuthi umuntu oyindoda akumelanga adidizele emkulwini ephekela umkakhe labantwana.
Amadoda kumele awulahlele khatshana umqondo wokuthi kulemisebenzi yabobaba besekusiba leyabomama. Lolu lubandlululo nje.”
UBishop Sambo uqhubekele phambili wathi uyake anxuse amadoda enkonzweni yakhe ukuze awafundise ukupheka ngempelaviki.
Amadoda la asephekela omkabo kubikwa asepheka okwezinga lehoteleni sibili njalo ayabahlonipha amkabo.
UPetros Nkosi (66) uthe: “Ukupheka kungumsebenzi onzima. Omama kumele baphathiswe ngomkabo ngasikhathi sonke. Lokhu kuyaphathisa ekuqiniseni ubudlelwano phakathi kwamadoda labomkabo.”
UMerriam Hlongwane (46) uthe “Umkami sowaphenduka umngane wami oseduzane angisamkhangeli ngeso lokuthi uyinhloko yomuzi wethu kodwa usengumngane wami woqobo.” — Ubulembu
Online Reporter