Online Reporter
Langton Nyakwenda
SHASHA yeCastle Premer Soccer League, Scottland, ichaona kusimba kwayo maringe nekutamba mitambo yepasi rose apo ichabandana neKaizer Chiefs yekuSouth Africa mumutambo weToyota Cup munguva pfupi iri kutevera.
Chiefs yakakoka Scottland kuti ipinde mumakwishu egore rino segadziriro yayo yemwaka wenhabvu wa2026/2027.
Mutambo uyu uchatora nzvimbo paRoyal Bafokeng Sports Palace kuRustenburg nomusi wa26 Chikunguru.
Shasha yenhabvu yekuSouth Africa iyi yakatsinhira nezvemutambo weToyota Cup kuburikidza negwaro rayakaburitsa pakuparurwa kwemutambo uyu kuJohannesburg nomusi weChipiri svondo rino.
“Kaizer Chiefs, takabatana neToyota South Africa Motors, inonzwa manyukunyuku ekuparura chikamu chechitatu cheToyota Cup paKaizer Chiefs Village kuNaturena masikati anhasi (Chipiri). Chiitiko chepagore ichi chadzika midzi nechimbichimbi sechiitiko chakakosha pakarenda renhabvu,” inodaro Kaizer Chiefs.
Gore rino, Amakhosi ichange ichitamba neshasha yemuZimbabwe — Scottland FC.
Scottland FC ine vatambi vepamusoro, avo vanosanganisira vaimbotambira Chiefs, Knowledge Musona naKhama Billiat.
“Toyota Cup ichatambwa nomusi weSvondo, 26 Chikunguru, paRoyal Bafokeng Sports Palace kuRustenburg. Magedhe achavhurwa nenguva dza9 mangwanani. Chirongwa ichi chichatanga na12 nekutatsurana pakati peKaizer Chiefs Legends neJozi Masters. Mutambo welegends uchange uine vatambi vaimbotambira Bafana Bafana nevakatambira zvikwata zvakasiyana-siyana. Mutambo mukuru uchange uri pakati peKaizer Chiefs neScottland FC, uye uchatanga nenguva dza1500,’’ inodaro Kaizer Chiefs mugwaro rayaburitsa padandemutande rayo.
Jessica Motaung, anove marketing director weKaizer Chiefs, anoti vane mufaro mukuru nekuitwa kwemutambo uyu.
“Tinotenda zvakanyanya Scottland FC nekupinda mumutambo uyu uye tine tarisiro huru yekutaridza vatsigiri vedu mamiriro echikwata, chiine murairidzi mutsva, mwaka wenhabvu usati watanga,” anodaro.
Kaizer Chiefs, iyo iri kushandisa mutambo uyu segadziriro dzeCAF Confederation Cup, yakambotambirwawo nevatambi vemuZimbabwe vane chitsama makore adarika, avo vanosanganisira Musona naBilliat.
Musona akatamba nhabvu inodakadza kuAmakhosi asati aenda kuGermany.
Ebson “Sugar” Muguyo, Rabson “Sarafina’’ Mchichwa, Thomasa Sweswe, Mike Maringa, Kelvin Mushangazhike, Abbas Amidu, Kingstone Nkatha, Luke Petros-Jukulile, Tinashe Nengomasha, Ovidy Karuru, Zhaimu Jambo naWillard Katsande vamwe vevakatambira Kaizer Chiefs.
Nerimwe divi, mumitambo yeCastle Premier Soccer League, Scottland iri kurwa semvumba zvakare.
Yakundwa kamwe chete mumitambo 16 uye iri pamusoro pelog pamwe chete neCAPS United. Chimwe nechimwe chezvikwata izvi chine mapoinzi 31.
Kunyangwe zvazvo murairidzi weScottland, Norman Mapeza, pari zvino asiri kuda kutaura pamusoro pekutora mukombe weligi, chikwata ichi chinogona kuuhwinha zvakare.
Chikwata chekuMabvuku ichi chawana mapoinzi 13 kubva pa15 anotarisirwa kubva kumitambo mishanu yachapedzisira kuva nayo, izvo zvinoreva kuti yabudirira nechikamu che87 percent.
Chikwata ichi ndicho choga zvakare chahwinha mitambo yacho mitatu yadarika kakatevedzana.
“Pachiri pedyo (kutanga kufunga nezvemukombe),” Mapeza akaudza vatori venhau mushure mokunge chikwata chake chakunda Herentals 2-0 kuRufaro Stadium nomusi weMugovera wadarika.
“Kwatiri, tiri kungotora mitambo semauyiro airi kuita, tichitora mapoinzi ose, tozoona kuti chii chinoitika mukupera kwemwaka.
“Chakakosha pari zvino kutarisana nemutambo mumwe nemumwe uye nekuwana mapoinzi akawanda,” anodaro Mapeza.
