Sebehlatshwa ijekiseni yeCovid-19 abaleminyaka engu-16 le-17

YiNtatheli kaMthunywa

ABASAKHULAYO abaleminyaka ephakathi kwengu-16 le-17 sebengahlatshwa ijekiseni yokuvikela ukumemetheka kweCovid-19 yeSinovac.

Izikolo zemfundo yaphezulu kunye lamakolitshini axwayiswe ukuthi sebengaqala ukuhlaba abantwana laba ijekiseni yeSinovac.

Izolo ntambama uMphathintambo wogatsha lweHigher and Tertioary Education, Innovation, Science and Technology uSikhwicamfundo Amon Murwira omele uMphathintambo wogatsha lwezeMpilakahle lokondliwa kuhle kwabantwana uthe sokusemthethweni ukuhlatshwa kwabatsha.

“Ugatsha lolu lwazisa uzulu ukuthi ukuvikelwa kwabatsha abaleminyaka engu-16 le-17 ngokuhlatshwa ijekiseni yeCovid-19 sokuvunyelwe. Zonke izikolo zamabanga aphezulu, amakolitshi lamayunivesithi kunye lendawo lapho okuhlatshwa khona kukhangelelwe ukuthi ziqalise ukwenza imkhankaso yokuhlatshwa kwabatsha laba.”

Kusiyafika umhlaka 1 Lwezi abantu abangu-3 317 010 besebehlatshwe ijekiseni yokuvikela iCovid-19.