admin
Thokozile Mbedzi
KULENINA lelokhitshini yeCowdary Park koBulawayo elimangalise abantu ngemva kokutshontsha iUS$49 000 emsebenzini lathengela idlalicatsha lalo imota kunye lendlu.
USamukele Tshuma oleminyaka yokuzalwa engu-23 kubikwa ubesebenza kwelinye igalaji lamafutha ezimota ethela amafutha ezimoteni.
Kuzwakale ukuthi uTshuma waqala ukutshontsha imali emsebenzini mhlaka 14 Mpandula kwaze kwafika umhlaka 26 Mfumfu.
Omunye umfakazi obesebenza loTshuma othande ukwaziwa ngokuthi nguReason nje kuphela uthe imali ezazifakwa ebhanga nguTshuma zazingahambelani lalokho okusemabhukwini emali eyabe ingene ngalelolanga.
“Umqondisi wenkampani wananzelela ukuthi amafutha alethwa egalajini kahambelani lemali esebhanga basebesola ukuthi kungenzakala kube khona okutshaya amanzi yikho okwenza kwaba lokuhlolisiswa kwezimali kwathathwa lama-statement.
“Ku-statement bananzelela ukuthi imali efakwe ebhanga kayisiyo eyayisemabhukwini asenkampani. Bananzelela ukuthi ngenyanga kaMpandula watshontshela inkampani imali engange- US$21 000 ngenyanga kaMfumfu watshontsha iUS$28 000,” kuchaza isisebenzi leso.
“USamukele utholakale elomabonakude i-45 inch, lemali engange $7 290 ngaphansi kombheda. Uveze futhi ukuthi iUS$4 600 wayinika ijaha lathenga imota yomhlobo lweBMW, walithengela njalo indlu yeUS$12 000 elamakamelo amahlanu eCowdray Park kukanti iUS$7 000 wayinika umfundisi webandla akhonza kulo,” kulandisa uReason.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yakhe njalo ukhuthaze abamankampani ukuthi bananzelele izisebenzi ezibamba izimali.
“Udaba lwesisebenzi esitshontshe imali enkampanini solufikile ehofisini yethu ngakho abaqhatshi kabananzelele njalo balandelele izisebenzi ngaso sonke isikhathi ikakhulu lezo ezifaka imali emabhanga,” kuphetha ulnsp Ncube.
Online Reporter