Sebekhona odade beDubai

The UAE Women’s national cricket team

Brandon Moyo

ABADLALI bekhilikithi abasefazane abelizwe le-United Arab Emirates sebefikile koBulawayo, lapho abazadlala khona labakuleli, amaLady Chevrons kumidlalo eyisithupha kusukela ngoLwesihlanu kuliviki.

Amaqembu la azaqala ngokudlala kumahlandla amane kuWomen One Day International (WODI) qede lapho adibane kuma-T20Is enkundleni yeQueen Sports Club.

Ukaputeni we-UAE, u-Esha Oza, uthe bazabe bechinsa ukujika ibhola elimhlophe ngakho kuzakuba ngumdlalo ozahlabusa, nanko baqede inyanga ezinengi belungiselela.

Ilizwe le-UAE lathola imvumo yokudlala ama-ODI ekuqaleni kwalumnyaka.
Ekhuluma leZimpapers Sports Hub ngoLwesibili emini, ngesikhathi beqabuka ukunyathela eQueens Sports Club, u-Oza uthe bazimisele ukudlala ngokupheleleyo njengoba bedibana leqembu elihlonitshwayo kukhilikithi.

I-UAE ibaliselwa kumazwe aphansi kukhilikithi, abizwa ngokuthi ngama-Associates ngaphansi kwe-International Cricket Council.

“Sisebenze gadalala kunyanga ezedluleyo, silungiselela lumdlalo. Kuyatshisa eDubai kodwa senelise ukulungiselela, sitshona isikhathi eside sitshiswa lilanga. IZimbabwe sake sadlala layo kuhlandla lama-T20Is. Liqembu elikhulu njalo lizikhulule ukuthi lidlale lathi esiphansi. Siyalamukela lelithuba,” kutsho ukaputeni lo, oleminyaka yokuzalwa engu-27.

Uqhubeke wathi: “Wonke umuntu eqenjini lethu uyajabula ngokuza lapha. Ukudlala ama-WODI kukhulu kithi. Esikufunayo yikudlala kuhle, siqine ngesikwaziyo.”

AmaLady Chevrons angena kumidlalo le ezethemba kulandela ukunqoba ku-ICC Women’s T20 World Cup Qualifier eNamibia kulinyanga. Ukunqoba lokhu kutsho ukuthi bazadlala ku-ICC Women’s T20 World Cup Global Qualifier 2026, ezweni leNepal ngoZibandlela kusiya kuNhlolanja.