admin
KULETHIMBA “labadala” eselithunywe ukuthi liyekhulumisana lomdlali webhola uKhama Billiat kulandela ukubika kwakhe ukuthi usetshiyane lokudlalela amaWarriors.
Inyathelo likaBilliat alizange lithabise ngitsho lalabo abangalandeliyo umdlalo kanobhutshuzwayo.
UBilliat, kunsukwana ezisanda kwedlula utshele umhlaba ukuthi kaziboni ephindela eqenjini lesizwe, loba nje engazange atsho ukuthi lokho kudalwe yini.
Iqula lezithunywa “zabadala” leli, likhangelelwe ukuthi liyefika eSouth Africa loba nini ukuyazama ukukhombisa ingcitshi yeKaizer Chiefs le ukuthi ibuyele kuma-Warriors.
UBilliat ufuneka kakhulu ngomnyaka ozayo kumncintiswano we-Africa Cup of Nations (Afcon) ngenyanga ezayo.
Iphephandaba likazulu lizwe ngabafakazi abaqotho ukuba izithunywa ezizahlala phansi loBilliat zikhokhelwa ngosaziwayo kunguqu abaseHarare ababalisa umsakazi wodumo uCharles Mabika.
“Bafuna ukuyamkhuza lokumncenga ukuthi abuyele kuma-Warriors,” kutsho umfakazi oseduzane lodaba.
“Bakhathazekile abadala laba ngokuthi uBilliat ufulathele iqembu lesizwe. Kungumbono wabo ukuthi kumele abeyingxenye yeqembu lama-Warriors.
Akukahanjwa eGoli kodwa okuhle yikuthi laye umdlali usevumile ukuthi abadala bahlale laye phansi kubotshwe iqhinga.”
Nxa engavuma ukuphenduka eqenjini, uBilliat uzaqinisa indawo yabagadli lasesiswini senkundla okuyilapho agxile khona laseqenjini leKaizer Chiefs.
Ukhalale ama-Warriors ngesikhathi inhlanganiso yeSports and Recreation Commission imisa amalunga ebhodi yeZifa umsebenzi.
Iphephandaba likazulu lixhumane labathandi beqembu lamaWarriors ababike ukuba ukuthumela abadala licebo elihle.
“Yikho esikwaziyo ngesiko lethu njengabantu abamnyama. UBilliat ngumdlali wethu, ngumntwana wethu ngakho akuxoxiswane laye aphenduke. AmaWarriors ayamdinga, laye uyalidinga iqembu lesizwe,” kutsho uCarlmax Nkomo olilunga lequla labasebekeli bama-Warriors.
UGilbert “Mboma” Sithole owePlumtree utshayele ihlombe iZifa ngokuphanga ukuphatha udaba lukaBilliat.
“Angeke sibe leqembu elipheleleyo nxa uKhama engekho. Umdlali lo ubeyinsika ekuthi amaWarriors afinyelele ku-Afcon. Kaphenduke eqenjini.”
Umdlali lo bekulindeleke ukuthi akhokhele amaWarriors ku-Afcon encedisana lokapteni uKnowledge Musona. – Soccer24.
Online Reporter