Online Reporter
KULOMHLABELELI owayelodumo weqembu leSoul Brothers elizweni laseNingizimu Afrika wayelengoma elamagama athi: “ubosebenz’ ubuye ndoda, ekhaya kuyonakala.”
Ingoma le yayiqumbaqumba amadoda amanengi njengoba kuyiwo ayesebenza emadolobheni, kusenza ukuba bakhumbule imideni yabo.
Isikhathi sekhefu leKhisimusi sesisondele sezizabuya ngobunengi injiva. Lezacina kudala ukubuya ekhaya ngalelikhefu ziyakhumbula ekhaya. Zikhona ezihamba ziphose itshoba ezibuya gqo kumbe ezibuya ekhaya nxa kulezimfa lakho futhi kuyabe kubhubhe umzali. Nxa kungayisikho lokho, vele ziyabe sezidliwe zindunduma.
Lezi yizo ezivame ukuqamba amanga aluhlaza tshoko. Lezi zibuya njalo zingaphathanga lutho, uhle uzwe ngenkulumo zakhona sekuthiwa bekunzima emngceleni bathethe yonke impahla. Kumbe uzwe kuthiwa umalayitsha udlule lempahla uzabuya lazo, lizaze liyedlala iKhisimusi ngengqweqwe zomlomo.
Nxa kuyilezi ezingela zincwadi zokuhambisa ezichapha ngapha uzwa kuthiwa sidibane lendlovu bamane baphaphatheka kwamotshakala yonke into. Kulomunye umzawami ojwayele ukuthi ulenkampani njalo uhamba etshela abafana besigabeni ukuthi aluba balamaphasipoti ngabe uyahamba labo ayebangenisa emsebenzini.
Lonyaka-ke khona kabuzanga elangeni ngoba inengi labafana liwathethe amaphasipoti asazi ukuthi iyozala nkomoni ngoba abasiki bebunda bathi vele lenkampani akhuluma ngayo kalayo, uyazihawulela khonale eGoli.
Abanye benzenje lemakhaya abalangubo zokwembatha, abanye njalo lezindlu zokulala ziyabe zisilela uthole indoda endala ilala exhibeni labafana kweminye imizi yendlalelwe emkulwini ufice umlilo usubaselwa egumeni ngoba emkulwini kulele “umuntu wemzini.”
Isimanga yikuthi ezinye zakhona zibuya zicwebezela zifake lamazinyo egolide uthi kumbe kanti ngabaphila ngokubamba inkunzi njalo uyathi ebuye engelalutho afune ukuhlatshelwa imbuzi lithi lingamhlabela esesizwa ubunandi bamalulu, athembise ukuthi nxa efika ngeviki elizayo uzathumela yonke into efunekayo, ngapha umuntu wakhona umakhalekhukhwini uyabe semthengisile ukuze athole eyokukwejisa labangane, kuthi lapho sekumele abuyele abazali bacine bengena esibayeni ubusuzibuza ukuthi nguye lo othi uzathumela yena esehlulwa yikuzigadisa.
Ngikhumbula omunye umngane wami ngavakatshela eGoli njengoba ngangilekheli yalapho ahlala khona ngamvakatshela kanti unkalakatha uhlala emkhukhwini izindlu lezi ezikhandwa ngamazenge. Ngamangala esengicela lentshintshi yebhasi ethi akaphethe lutho kodwa inyanga yayiphelile, ngahle ngayifunda ivaliwe ngavalelisa ngabuyela lapho engangifikele khona. Umngane wami lenhloni lazo zasezimbulele esekhumbula amanga ayengitshela wona sisekhaya.
Lingakasuki eGoli bonani ukuba liyaqogelela imali zenu zokubuya ekhaya lingaze lafika lahlupha abantu lapha selifuna ezokubuyela.
Nxa ingala ukwenela imali yakhona, ngangcono uludlulisele kuPhasika uhambo lwakho lokuza ekhaya kulokuthi uzothwalisa nzima abantu.
Lonyaka asifuni kuqanjelwa amanga, sesikhathele yiwo.
Ayixabene.
