marble nkomo
Fungai Muderere
IQEMBU lenguqu elidlala kuPacific Breeze Zifa Southern Region Division One, iZebra Revolution, seliqhatshe uDalubuhle “Van Vodloza” Sibanda njengomaqhuzu walo.
Lokhu kumenyezelwe kuliviki njalo uSibanda uhle wabikela iZimpapers Sports Hub ukuthi kasoke adlalise ithuba lokuletha inguquko elempucuko eqenjini.
Kumbiko wayo iZebra Revolution ithe: “Sijabule kakhulu ukubika ukuza kukaDalubuhle Sibanda njengomphathi wethu omutsha.”
USibanda ungena eqenjini ephethe ubungcitshi kwezokusebenza kumankampani lakunhlelo zokukhitshwa kwembiko lakunhlelo zemisebenzi yokuthokozisa uzulu.
Ubungcitshi lobu, abuthole kuminyaka edlula phose amatshumi amabili, kuzabaluleka ekuqhubeni umsebenzi wakhe kuZebra Revolution. USibanda kuzalundeleka ukuthi alethe imibono ocacileyo, elempumela enhle kunye lolwazi.
Ekhuluma leZimpapers Sports Hub, uSibanda uchaze umbono lenhloso alayo ngeqembu.
“Ukuthatha lesi sikhundla sokuba ngumaqhuzu weZebra Revolution kungumsebenzi oseduzane lenhliziyo yami,” nguSibanda lo.
“Umbono wami yikuguqula leliqembu libalelwe kwezinkulu emdlalweni webhola. Kumele sibeliqembu lakoBulawayo, elilembali koBulawayo. Ngizaletha indlela entsha yokuphatha umsebenzi.”
Uthe ukholelwa ukuthi iqembu kumele likhulise, liqeqetshe abadlali abapheleleyo, abenelisa Ukuqina ngesikolo kunye lasemdlalweni.
“Ukubaluleka kwabadlali abakhuliswe kuhle ngeke sidlale ngakho. Sikhulisa abafana ukuba bahlakaniphe ekilasini njengasebholeni. Ngokugxila emfundweni, sakha abadlali abahlakaniphileyo labaziphatha kahle, abalungele impilo ngaphakathi langaphandle kwenkundla,” kutsho uSibanda.
Uthe uhlelo lwabo lubonakala ngokukhulisa umdlali oselodumo okuHighlanders lamaWarriors uMongameli Tshuma, owakhuliswa yiZebra Revolution.
UTshuma ubekuqembu lamaWarriors ebelidlala eBotswana emqhudelwaneni weMukuru Four Nations.
“Nxa ufuna ukubona amandla ohlelo lwethu, khangela uMongameli Tshuma. Uhambo lwakhe lusuka ekukhulisweni kwabadlali abancane kusiya ekubeni ngumdlali okhethwe eqenjini lelizwe. Kuyisibonelo esipheleleyo.
“Okubalulekileyo yikuphindaphinda impumelelo enjengale. Ngizasebenza ekuthuthukiseni inhlelo zethu ukuze wonke umdlali omncane abone indlela yokufinyelela phezulu. UTshuma uyisibonelo esizalandelwa yibo bonke.”
Ngakolunye uhlangothi, emidlalweni yeviki lesibili kuPacific Breeze Zifa Southern Region Division One League edlalwe ngempelaviki, iAqua Stars idlale ngokulingana nge 0-0, ikanti iZebra Revolution ihlulwe yiBlackrock ngo 1-0.
IBulawayo Warriors ibuyele emuva yalinganisa nge 1-1 leHwange. IMosi Rovers itshaye iVictoria Falls City Herentals nge 2-0. Imbizo FC yanqoba iMegawatt ngo 1-0. ITalen Vision eqeqetshwa nguMkhuphali Masuku itshaye iBosso 90 nge 1-0.
INjube Spurs leJordan Sinnott zidlale ngokulingana nge 1-1. INkayi United ithole ukunqoba nge 1-0 ibhekene leZimbabwe Saints.
Impumela ngokugcweleyo
Zebra Revolution 0-1 Blackrock, Aqua Stars 0-0 Casmyn, Hwange 1-1 Bulawayo Warriors, Victoria Falls City Herentals 0-2 Mosi Rovers, Imbizo FC 1-0 Megawatt, Talen Vision 1-0 Bosso 90, Zimbabwe Saints 0-1 Nkayi United, Njube Spurs 1-1 Jordan Sinnott.
Online Reporter