admin
Johas Moyo
KUDABA olusansumansumane njalo oluyimpicabadala kulesalukazi esingumkhunkuli seZhombe bucwadlana ledolobho leKwekwe okubikwa sesisiya ngaphandle ngomlomo kulandela ukubulala sisidla inyama zabantu abangu-20 kanye labantwabaso abane, uMthunywa uyakuveza lokhu lamhlanje.
Kubikwa okubangele ukuthi isalukazi lesi siqalise ukuya ngaphandle ngomlomo yikuthi sala ukubulala sidle umntanaso onguye osesele esigcinile uKurai Manjengwa njalo akucaci ukuba sewake waya esibhedlela ukuyahlolwa ngodokotela ukuze kutholakale imbangela yalokhu.
Isalukazi lesi uDiana Chibhago Manjengwa oleminyaka yokuzalwa engu-87 njalo okubikwa elilunga lebandla leAnglican ohlala esiqintini esingaphansi kwenduna uGwesela uqalise ukwenza ingcekeza ngomlomo kumaviki amabili adluleyo.
UMthunywa uzwe ukuthi udaba lolu seluke lwangena enkundleni yenduna uGwesela lapho ugogo uManjengwa aveza khona imfihlo yakhe labangane bakhe.
Kubikwa isalukazi lesi saveza ukuthi sabulala abantu abangu-20 esigabeni kanye labantwabaso abane.
Kuzwakale njalo ukuthi isalukazi lesi saveza njalo enkundleni amagama alabo esisebenza labo nxa bethakatha.
Iphephandaba likazulu likhulumisane njalo loSobhuku uPetros Mancitshana obikele uMthunywa ukuthi isalukazi lesi sesixotshiwe ebandleni.
“Ugogo uManjengwa kaziwa ukuthi ungaphi khathesi njalo lebandleni sewaxotshwa ngoba abeZinatha bake bazama ukumlahlisa umoya kodwa yena wasuphuna izikhonkwane ezazibethelwe encedisana labanye bakhe.
“Waphinda njalo waya kwelinye ibandla leZiyoni esiyadinga uncedo lakho futhi bamxotsha ngesizatho esifanayo,” kutsho uSobhuku uMancitshana.
Ekhuluma loMthunywa ngaloludaba uSobhuku Ntshangase uveze ukuthi akalankani ngalokho akuzwayo ngokulimala kukagogo uManjengwa owaze waqanyulwa umlenze esigabeni seThombankala ngabanye abathakathi bebanga isidumbu sosane.
“Kuliqiniso sibili ukuthi umsolwa wazichaza yedwa enkundleni ukuthi ungumthakathi usebaqedile abantu ikanti njalo wephuka unyawo besilwa labanye abakhunkuli kwesinye isigaba lapho ababesiyakudla khona inyama yosane.
“Into edanisa kakhulu yikuthi ebuzwa ngokuthi kungani esesenza ingcekeza ngomlomo waveza ukuthi baxabana labanye bakhe sekumele edle umntanakhe okuyinto eyaba nzima kuye wasecabanga ukuthi atshiyane lobuthakathi,” kutsho uSobhuku uNtshangase.
“Ugogo lo waveza njalo ukuthi waqalisa ukuloya kudala ethi bahamba ngokhomane nxa besiyaloya endaweni ezehlukeneyo,” kuphetha uSobhuku uNtshangase.
Online Reporter