admin
Abel Zhakata
YAKAVE batai-batai padare reMutare Magistrates’ Courts nemusi weMuvhuro apo mhomho yevanhu yakaungana ichida kuona zinyoka rerudzi rweshato — iro rinonzi nemumwe mukadzi ndiro rinomukechera zvikomba nekuita kuti ahwinhe njuga — mushure mekunge raunzwa kudare seumboo zvichitevera kusungwa kwaakaitwa apo akabatikidzwa aine chikara ichi mune imwe hotera iri muguta iri.
Shato iyi yakaunzwa kudare iri nevashandi veZimbabwe Parks and Wildlife Management Authority (Zimparks) seumboo.
Imhosva munhu kubatwa aine shato kana dzimwe mhuka dzesango asina bvumo nemagwaro ekugara nazvo.
Queen Mpofu (21) akabuda muKwayedza resvondo rapera apo akasungwa nemapurisa eZimbabwe Republic Police mushure mekuwanikwa achigara nenyoka yakareba mamita matanhatu iyi muhotera.
Mushure mekunge yanyorwa seumboo mumagwaro ekudare, shato iyi yakabva yadzoserwa kuMutare Museum kuti inochengetedzwa sezvo padare iri pasina nzvimbo yekuichengetedza.
Vakadzi vaviri — Queen naLoice Samhere, uyo anova muridzi weGreen Gate Lodge iri muguta reMutare — vakamiswa mudare iri vachitarisana nemhosva yekuwanikwa vaine zinyoka iri.
Vakaisa chikumbiro chavo chekuti vapihwe bhero kudare guru reHigh Court mushure mekunge mutongi avarambira.
Queen anoti anoita basa rekutengesa muviri wake.
Vaviri ava vakaendeswa kujeri mushure mekunge mutongi Notebular Muchineripi avarambira bhero ndokuti vanofanira kudzoka kudare musi waZvita 20 apo kutongwa kwenyaya yavo kuchatanga.
Vaviri ava vari kutongwa nemhosva yekutyora mutemo weSection 45 neSection 128 weParks and Wildlife Act uyo unorambidza kuvhima, kuchengeta kana kuwanikwa munhu aine mhuka dzinochengetedzwa pasi pemutemo.
Kana vakawanikwa vaine mhosva, mumwe nemumwe wavo anogona kutongerwa kugara mujeri kwemakore mapfumbamwe.
Gweta revaviri ava, VaChris Ndlovu, vakazivisa kuti vakatoisa chikumbiro kudare reHigh Court chekuti vasungwa ava vapihwe bhero.
“Tanyorera chikumbiro chekuti vapihwe bhero kuHigh Court uye tichakuzivisa mamiriro ezvinhu apo tinenge taziviswa zvichabuda,” vanodaro.
Pakutanga, mapurisa akasunga Queen pamusoro penyaya iyi asi Samhere akazosungwawo mushure mekunge Queen adura kuti uyu ndiye muridzi weshato iyi.
Queen anonzi akaudza mapurisa kuti aingochengeta nyoka iyi bedzi asi murudzi wayo ndiSamhere.
Online Reporter