Online Reporter
Muchaneta Chimuka
CHIKWATA cheShingai Dance Troupe chemudunhu reHarare, icho chakaratidzira hunyanzvi mumutambo wembakumba, ndicho chatora mukombe pamakwikwi eChibuku Neshamwari Traditional Dance National Final ayo aitirwa muHarare Gardens nomusi weMugovera wadarika.
Izvi zvakaona chikwata ichi chichienda kumba neUS$15 000.
Nhamba yechipiri yakatorwa neEzimnyama Arts Ensemble yekuBulawayo iyo yakawana US$10 000, kuchizoti chikwata cheDapurahunanzva chekwaMutare chakatora nhamba yetatu chikawanawo US$7 500.
Dopiro iri rinova rinoitwa gore negore, rinotsigirwa nekambani yeDelta Corporation.
Gore rino, kambani iyi iri kupemberera kusvitsa makore 63 kubva pakatanga chirongwa cheChibuku Neshamwari.
Shingai Dance Troupe yakatora mukombe uyu mushure mekutamba zvinonwisa mvura apo yakaratidzira zvidavado zvemutambo wepasichigare wembakumba.
“Chikwata ichi, chinova chinobva munzvimbo inowanzotarisirwa pasi yeMufakose, chakaenda nemari inoita US$15 000 chichiteverwa nechekuBulawayo cheEzimnyama Arts Ensemble icho chakaenda neUS$10 000 apo Dapurahunanzva yekwaMutare yakatora nhamba yetatu ikaenda neUS$7 500. Ticharamba tichitsigra makwikwi aya senzira yekusimudzira tsika nemagariro emuAfrica. Gore rino, panga painewo mitambo yezvigure yakaratidzirwa. Makwikwi aya aripo senzira yekuti tidzorere kunharaunda dzinova dzinotitsigira,” vanodaro Mai Patricia Murambinda vanova General Manager – Corporate Affairs Delta Corporation Limited.
Makwikwi aya akaitwa pasi pedingindira rinoti: “Ngoma Ngairire Shamwari”.
Akapindwa nezvikwata zvakabva kumatunhu gumi enyika.
Vanoda kupinda mumakwikwi aya vanonyoresa kusangano reNational Arts Council of Zimbabwe.
Chikwata cheShingai Dance Troupe chakavambwa mugore ra1995 uye chakapemberera mubairo wacho wechina wekutora mukombe.
Mukuru wechikwata ichi, Musa Lejala, anoti vanofara zvikuru nekukunda kwavakaita uko kwakabva mukushanda nesimba.
“Kuti ubudirire, zvinoda kushanda nesimba uye tinotenda kubatana kwakaita chikwata chedu nerutsigiro rwakabva kunharaunda. Chinangwa chedu ndechekuona kuti tsika nemagariro zvachengetedzwa. Vanhu vanodzidza panguva imwe cheteyo vachitandadzwa. Tinotenda zvikuru varongi nevatsigiri veDelta Corporation nekuramba vainesu kwemakore mazhinji. Tinovimbisa kuti ticharamba tichisimbaradza tsika dzedu kuburikidza nemitambo,” anodaro.
Vamwe vatsigiri vechirongwa ichi vanosanganisira National Arts Council of Zimbabwe (NACZ) neZimbabwe National Traditional Dancers Association (ZNTDA).
