Online Reporter
YiNtatheli kaMthunywa
AMAPHOLISA akoBulawayo acele uzulu ukuthi ancedise ngolwazi olungasiza ukuthi kubotshwe uNorris Pikanegore osolwa ngokudlwengula abantu abedlula i-30 eMgwanwini koBulawayo.
UNorris lo, oleminyaka engu-46 yokuzalwa, kubikwa wahlukuluza abantu laba ngesikhathi besendlini yakhe abeyenza i-rehabilitation centre yalabo asebeyizigqili zotshwala kunye lezidakamizwa.
Kubikwa kwathi kuvela udaba lolu, uNorris wacela ezinyaweni.
Kuvele ukuthi wahlukumeza ngokocansi abantu abaleminyaka yokuzalwa ephakathi kwengu-17 kusiya ku-47, okugoqela abesifazana labesilisa.
Abahlukunyezwayo laba babegcinwe endlini kaNorris, kuthiwa bathola usizo ngoba behlutshwa yizidakamizwa.
Loludaba selubikiwe, kuthiwa abantu abathintekayo sebekhulume ngokwenzakalayo, kodwa kusalindelwe uphenyo olugcweleyo yiziphathimandla ukuze kutholakale iqiniso eligcweleyo.
Amapholisa aveze ukuba uNorris wayesebenzisa indlu le ngaphandle komthetho ngoba kwakungelamvumo lechence lokwenza lokhu.
Kubikwa ukuthi izidakamizwa lotshwala bekulula ukuzithola phakathi kwendlu le.
Kubikwa phakathi kwamanye amalanga ngenyanga kaMabasa 2026, umsolwa wahlasela abanye ngokocansi, njalo waphinda wahlasela abanye esebenzisa induku, ebethusela ukuthi bangatsheli muntu ngalokhu okwenzakalayo.
Intatheli ixhumane lobambele isikhulumi samapholisa koBulawayo uAssistant Inspector Thandekile Ndlovu obike ukuba umetheswacala uyadingwa.
“Amapholisa acela umphakathi ukuthi loba ngubani ololwazi olungaphathisa ukuthi kubotshwe uNorris Pikanegore axhumane leZRP Nkulumane ku-0292-496756 kumbe aye kuloba yiphi inkamba yamapholisa eseduzane laye,” kutsho u-Asst Insp Ndlovu.
