admin
Cornelius Luphahla
MTHWAKAZI kaNdaba ziyasunduzana insuku zibe ngamaviki lawo angqikilane abe zinyanga lazo zithubulane zibumbe umnyaka. Nanku-ke sokwenzakele lokhu sesize siwela iKhisimusi eyiyo ehlola ukuphela komnyaka.
IKhisimusi le phela kayithandwa ngumuntu wonke njalo ngoba abanye kunje abakayilungiseleli ngakho bezwa ubuhlungu nxa bebona insuku zisunduzana kanje. Abanye ngabangayinakiyo njalo abangelandaba lokuthi sifikile.
Abanye njalo basuka bayijabulele kakhulu bengazi ukuthi yikho abazaphelelwa khona zimpilo zabo.
Ensukwaneni ezedluleyo iKhisimusi ibiqakathekile kakhulu ngoba okhekhe bebezitika bakithi ngezifela emlonyeni balale ngesibomvu baze bafise ukuthi ngabe iyaphindwa kabili. Yikho-ke okwasukela khona isitsho sokuthi iKhisimusi ibuya kanye ngomnyaka.
Angithi nje kwakuthi nxa sezisondele insuku zeKhisimusi abantu bawanombele amabhasi beqonda emakhaya abanye beqonda emadolobheni. Aziyabuzeli nje izimota ngalezinsuku njalo akuvamanga ukuthi liphele kukuhle lelikhefu.
Abanye kwakuthi nxa kuphela lelikhefu besemajele kuthi abanye babe ngabangasekho emhlabeni. Kunjalo bakaMalandela insizi lenjabulo kuvame ukuza kubelethene ngakho kasivuleni amehlo ukuze singaze sawela ensizini.
Abanye bavame ukuthaba baze bafana lomntwana odabule imbeleko engazi ukuthi uzabhajulwa ngani. Lokhu kuvame ukwenzakala ngokuthi abantu ikakhulu intsha ivame ukunatha utshwala idakwe icine ingasazazi. Abanye ngabathi bengadakwa balwe kube luthuli umuntu aphethe sevuka sesesitokisini.
Khonapha-ke akwaze kwaswelakala okuthiwa ubulewe kumbe ubulele omunye ngenxa yokudakwa lokhu. Kambe ungekela njani ukwenza isiga wena ungasaboni lokuthi wenzani? Yikho abadala babethi utshwala budala kulomuntu, babekwazi ukuthi buyakwenzisa amanyala.
Amantombazana lawo asuka avuke okunye kulezinsuku uwathole sedakwe sengokunye sengasaziboni lokuthi wenzani. Isimanga yikuthi umntwana owenza kanje uyamthola emncane kakhulu asazi ukuthi uyabe ezingcoliselani.
Kambe nxa umuntu engadakwa njalo kusebusuku angithi yikho okudala ukuthi abhinywe engaboni lokuthi udlwengulwe ngubani?
IKhisimusi lomnyaka omutsha yikho okusuka kudale ukuthi amanye amantombazana ahle ahlaselwe yingculazi ngoba ayabe engaboni lutho. Abanye khonapha basuka bakutshaye indiva konke lokhu engikubalisa kodwa kuthi mhla welanga sokwenzakele bazisole okuthi kwenzakale njani.
Kulabo abatshayela izimota labo kabavuse inkophe ngoba sekuzinsuku ezinzima. Angithi nje abadala babethi ukugijima kayisikho kufika njalo babengasomi nxa besitsho amagama la. Kunjalo-ke lani bakaMalandela lingaze lajaha lapho elihamba khona kodwa hlalani liqaphele ngoba ingozi zinengi emgwaqweni.
Nakekelani impilo zenu bakaMalamndela ngoba insuku zenjabulo lezi zinsuku ezinzima kakhulu, zivame ukudlula lemiphefumulo eminengi kakhulu.
Ungaxhumana lomlobi ku 0775722298 kumbe I WhatsApp ku 0737771317.
Online Reporter