admin
Cornelius Luphahla
KULENINA elingumasitanda elokitshini leCowdray Park eMpompini elixotshe ikhosikazi leloja lalo lithi kalihloniphi kanti selithandana lendoda yaleliloja.
Indaba le yenzakale kuviki ephelileyo lapho uNkosazana Beauty Moyo (42) oxotshe khona uNkosazana Vanensa Sibanda (22) esilojeni wasala lomkakhe uMnumzana Brighton Kanengoni (28) okubikwa usethandana laye, uMthunywa ukuzwile lokhu.
Inthatheli ikhulumisane loNkszn Sibanda wathi umasitanda lo ubehlala ebizela umkakhe endlini yakhe ebusuku uthe ngemva kokukhonona wamxotsha.
“UMaMoyo ubehlala ebiza umkami ntambama angene laye endlini yakhe okwesikhathi eside aze ayephenduka phakathi kobusuku. Ekuqaliseni ngangithula ngithi mhlawumbe kukhona ayabe embizele khona kodwa ngacina ngibona ukuthi kulokuganga abakwenzayo.
“Kuviki ephelileyo uthe embiza ngala ngathi kangifuni laye wabuya wazongithethisa wathi kangihloniphi. Ngemva kwalokho wathi kangiphume endlini yakhe kasangifuni. Okungimangalisileyo yikuthi uthe umkami asale lakhathesi ngikhuluma nje sebehlala bonke,” kulandisa uNkszn Sibanda.
“Lokhu kungizwisa ubuhlungu kakhulu ngoba lanxa ngizama ukubonisana lomkami kuyehlula uhle aqonde endlini kaMaMoyo. Ngokubona kwami uMaMoyo kukhona akwenza umkami ngoba ngeke wathandana lomuntu omdala kulaye,” kutsho uNkszn Sibanda.
UMnumzana Alfred Dube ongumngane kaMnu Kanengoni uthe selesikhathi ebonisa umngane wakhe ukuthi atshiye uMaMoyo kodwa uyala.
“Sengilesikhathi eside ngizama ukucebisa umngane wami ukuthi ehlukane loMaMoyo kodwa uyala. Ngingaze ngimbonise ngokuthi abantwabakhe sebehlupheka ngenxa yalokhu uthi akulandaba kungcono ngoba yena uhlezi mahala.
“Sengiswele ukuthi ngimenzeni ngoba akulalutho aluvumayo nxa umtshela,” kutsho uMnu Dube.
UNkszn Moyo uvumile ukuthi uxotshe uNkszn Sibanda wala ukuthi umthathele umkakhe wathi uzihlalele kuphela endlini yakhe ngoba bayizihlobo.
“Kuliqiniso sibili ukuthi ngaxotsha uMaSibanda ngoba ubengangihloniphi nxa ngikhuluma laye. Okokuthi ngimthathele umkakhe kangikwazi njalo umkakhe uzihlalele endlini yami ngoba siyizihlobo,” kutsho uNkszn Moyo.
Ebuzwa ngale indaba uMnu Kanengoni uthe indaba yomuzi wakhe ngeke ayibikele muntu, oyikhulumileyo kayiqedise.
“Indaba enjalo ngeke ngiyikhulume mina ngoba ngeyomuzi wami ngakho lowo oyikhulumileyo kayiqedise njengoyikuqala kwakhe,” kuphetha uMnu Kanengoni.
Online Reporter