admin
IKHEFU likaMpalakazi likhangelwe kakhulu ngabantwana ngoba phela kulapho okudlalwa khona iKhisimusi.
IKhisimusi lilanga eliqakathekileyo ebantwaneni abanengi ngitsho lasebantwini abadala ngoba phela kuthakazelelwa usuku umntakaNkulunkulu azalwa ngalo.
Ebantwaneni ilanga leli litsho ukudla ezifela emlonyeni kunye lokugqoka impahla ezintsha.
Uthola abadala begijima besiya le lale bedinga imadlana ukwenzela ukuthi ngelanga leli abantwababo bangabi zindlubu eziwele ephokweni.
Impahla sezibiza inkulungwane zamadola kukanti bona abadala bahola imali enlutshwane engayingaphi njalo sebetshona bejamile emabhanga bezama ukuthatha lawo masheleni angatsho lutho.
Okubuhlungu yikuthi umntwana ngeke akuzwisise ukuthi kungani owakhe umzali engamthengelanga impahla yokugqoka njengabangane bakhe kumbe iziwiji njengabomakhelwane.
Kuqakathekile-ke ukuthi abazali babonise abantwababo ukuthi izandla azilingani, bazame ukubakhulisa besazi ukuthi kumele usuthiseke ngalokhu olakho ukwenzela ukuthi ungahawukeli okomunye ngoba ekucineni uzatshontsha.
Yebo umzali ulakho ukuthi engela imali yokuthengela abantwabakhe impahla entsha eyokuba batayile ngayo ngaleli langa kodwa-ke ikhona evele ikhona endlini ehlanzekileyo abantwana abandise ukuyigqoka nxa besiyavakatsha.
Umzali kuhle aqale ukuyilungilungisa impahla le ebatshela ukuthi abaseyikuyigqoka kuze kufike iKhisimusi njalo lokuthi uzabathengela ukudla okuthile okufela emlonyeni.
Akunzima ukuhuga umntwana omncane akhohlwe ngitsho lomahluko ophakathi kwakhe labanye abantwana.
Umzali ulakho njalo ukuthatha abantwabakhe abahambise ngitsho endaweni yokuphumulela okulemidlalo etshiyeneyo emnandi abantwana bayetshona bekholisa bezidlalela njalo.
Kuqakathekile ukuthi umzali munye ngamunye enze ilanga leli libe mnandi kubantwabakhe ngoba belikhangelele ngamehlo abomvu.
Kuqotho ukuthi intengo yempahla isikhwelile ayisabambeki, kodwa-ke akusikho konke okudinga imali, uthando kunye lokwenza imidlalo abangandisanga ukuyidlala kulakho ukubakholisisa ngenye indlela.
Kuhle njalo abantu bakhumbule ukuthi akusibo bonke abantwana abalabazali kunye lezihlobo ezizakwenza usuku lweKhisimusi lukholiseke.
Likhulu inani labantwana abazintandane abangela muntu wokubanika uthando esilupha abantwabethu ekhaya.
Akubuhlungu ukuthatha impahla yomntanakho engathi isanhle uyeyinika omunye umntwana enhlanganisweni zentandane ukwenzela ukuthi lelakhe ilanga libe mnandi.
Abantwana abagcinwe enhlanganisweni lezi ezitshiyeneyo bafana xathu labantwabethu abasezindlini labo ilanga leli liyabaqumbaqumba kodwa bona-ke basuka bazwe ubuhlungu enhliziyweni zabo ngoba bengatholi lokhu abayabe bekukhangelele.
Akusimlandu wabo ukuthi abalabazali. Abanye babhujelwa ngabazali kukanti abanye balahlwa ngabazali babo ngezizizatho ezitshiyeneyo. Ngakho-ke asibeni ngabazali babo thina.
Bekungaba njani ukuthi umuntu munye ngamunye azinikele ukuthatha okuncane alakho ayekupha omunye umntwana ongela mzali kunye lezihlobo.
Kuncedani kambe ukuthi imuli ipheke ukudla okumnandi, idle ize inike lezinja lazo zidle zize zikukhonkothe abanye abantwana kundawo ezigcina intandane besidla ingqweqwe zomlomo?
Ngakho-ke sikhuthaza uzulu emadolobheni ukuthi avakatshele lezindawo ezihlala intandane ayesiza kuthi abasemaphandleni labo basize intandane ezihlala labogogo abangaselawo amandla okuziphandela.
Online Reporter