Online Reporter
Nkosilathi Sibanda
UMDLALO kanobhutshuzwayo uyakhula eBinga, eMatabeleland North nanko iqembu leBinga Football Academy belinxuswe ukuyadlala lokuthapha ulwazi ngalumdlalo edolobheni leLusaka eZambia.
IBinga Football Academy ihambise amaqembu ama-Under-13, 15, 17 le-Under-20, abahlale eLusaka okwamalanga ayisithupha, kusukela mhlaka 26 Mabasa.
Badlala imidlalo elitshumi lanhlanu, kusiba lamakilasi okufunda ngomdlalo, befundiswa zingcitshi ezivela emazweni atshiyeneyo. Kumidlalo yokuqala, iBinga Football Academy yadlala imidlalo emihlanu leqembu leMy Bro Academy lapho iqula le-Under-15 elanqotshwa 2-0. Ama-Under-13 wona aqeda engutshiki lobhanqa 0-0. Kumdlalo wama-Under-17, lanqotshwa 2-1, kuhlohle uZibusiso Shuma. Ama-Under-12 anqoba 1-0, kuhlohle uTito Ncube.
Kweminye imidlalo, iBinga Football Academy yadlala lamaqembu eKafue Celtics yanqotshwa 7-0 kuhlandla lama-Under-17, qede lapho yatshaywa 4-2 kuma-Under-15, ihlohlelwa nguNcube njalo. Kuma-Under-13 kwaba yi 1-0 kuhlohle uEmmanuel Tanyanyiwa. Kumdlalo wesibili kuma-Under-17, iBinga Football Academy yanqotshwa 6-0.
Komunye umdlalo, badlala leSporting Lusaka U-17 banqotshwa 3-1, ngemva kwalokhu kwalandela umdlalo wama-Under-15 lapho abaqotshwa nge 1-0.
Ekhuluma lentatheli yephephandaba likazulu, umqondisi weBinga Football Academy uPride Ngwenya uthe babonga ukunxuswa lesiphatho esihle eZambia.
“Uhambo lwethu beluluhle njalo silokuthaba ukuthi abadlali bethu bathola imfundiso lokuncintisana labanye ontanga abadlalela amaqembu aseZambia lakwamanye amazwe. Sibonga kakhulu uMartin Silwenga, umqondisi we-My Bro Academy loLee Kawanu, ikhansili yeBinga Rural District Council uJohn Muzamba, iJimba Safaries, inkampani yeMr Sinkwa Bakery, inhlanganiso yeSports and Recreation Commission labaphathi bogatsha lwe-Immigration eZimbabwe laseZambia,” kutsho uNgwenya.
Uthe abadlali bathola ithuba lokuxoxa lengcitshi zomdlalo wenguqu eZambia ezigoqela lowake wadlalela iCAPS United kuleli u-Ian Bakala oseqeqetsha iqembu lelizwe leZambia Under-17. Omunye oxoxe labadlali owayedume kuleli nguJoseph Mwansa wadlalela iHwange. UMwansa usekhokhela elinye ikolitshi elifundisa inguqu eZambia.
UNgwenya uthe lenkokheli zeBinga Football Academy zathola ulwazi.
“Bekumnandi njalo sithole imfundiso lathi sizinkokheli. Abafana bathole ukutshaywa ngumoya bafika kundawo abakade bengacabangeli ukuthi bengazifika.
“Sifunde okunengi kubaqeqetshi abasezingeni eliphezulu labaphathi bebhola. Sibelethuba lokuzilolonga lokufunda saphinda sabelana ulwazi ngebhola, anduna iqembu lamaUnder-20 eZambia liye ku-Afcon,” kutsho uNgwenya.
