adminNGITHEMBA uphilile khulu, ngehlukana lomfazi silomntwana oyedwa. Kunsukwana ezisanda kwedlula wafika ethi ulande okungokwakhe mina kangizange ngidinge okunengi wathwala inyakanyaka yakhe yonke wahamba watshiya lomntwana. Khulu lokhu sokungokwesithathu ekwenza; ukuzothatha impahla. Besengilomunye ebesengisakha laye umuzi manje lokhu sekungikhathaza ngoba uhamba engilandela, njalo uselenamba zikamakhalekhukhwini zikamama engifuna ukumthatha kungakho usehlala emfonela emthuka. Ngenzenjani Khulu nguwe ongangihlahlelela lindaba.
Impendulo
Ngesintu sakithi esibalulekileyo umfazi uyavelelwa ngakibo ngusodombo eliyabe limthumile njengomuzi, ukwenzela ukuba lanxa isibane sothando sesichitshile, yenalo umuntu obengusodombo nguye okufanele ambuyisele ngakibo ayebatshela izizatho zonke ezenze umtshado wachitheka. Nxa kwenzakele konke lokhu akuvamanga ukuba khona uhlupho olalo. Kungakho-ke dinga usodombo wakho nxa ekhona umchasisele lonke uhlupho lwakho, libeselimthuma ngakibo kalo umama ayebabikela ngokwehlukana kwenu langohlupho asekupha lona. Okwesibili ulakho ukuyadinga lokhu abakubiza ngo kuthi yi “Peace order” emthethwandaba.Lokhu kuzamenqabela ukuthi abe elokhu ebuya ezotshaphaza umuzi wakho, njalo kuzavikela lalo umama osuhlala laye. Kanti vele lezompahla ezithathwa amalombolombo kazipheli kutheni kumbe yiwo amangena njani okuzogubha lokubasela uhlupho emzini wakho? Nxa kusesekhona okwakhe kuthwale konke ukuse ngakibo hatshi ukuba umvumela ezophambanisa umuzi wakho. Engahlala esenzenje uzahlanyela ukungezwani phakathi kwakho lonkosikazi osulaye.
Umbuzo
Ngingumama oleminyaka yokuzalwa engu-26 sengalotsholwa kathathu ngisehlukana lamadoda. Sengike ngabhoda kubosiyazi bathi bona ngilabadala kodwa mina kuyangihlupha lokhu ngoba mina ngifuna indoda. Abanewethu bayala ukungincedisa, abazali bami bona sebabhubha. Nginceda khulu ngifuna ukuhlala emzini wami lami.
Impendulo
Awusatshongo phela mzukulu ukuba osiyazi bathi wenzeni njalo uhlupho lwakho lulungiswa ngokuphatha inkezo kumbe kufuna ukuba uye enkundleni. Nxa abanewenu besala kunganani uzame oyihlo abancane kumbe izihlobo zakibo kayihlo nxa kuyikubamba inkezo zibike enyokeni zakini labo balelungelo lokwenza lokhu, njalo lazo inyoka zibavumele. Kwesinye isikhathi kuyabe kufuneka uye enkundleni, njalo lazo izihlobo zakoyihlo zilakho ngosiko lwesintu ukumela lumsebenzi. Kuyadingeka ukuba ukuhambe sibili uyekuzwa ebantwini ababili kumbe abathathu ube usuqathanisa okuzwileyo ukuze uthi ngesikhathi ulungisa kube kanti ulungisa into ezakusiza. Njalo isikhathi esinengi umuntu uvame ukusizwa yilokhu okholelwa kikho. Kuyadingakala ukuba uthi usenza wonke amasu angakuphilisa ufake ukholo lwakho phambili ukuze usizakale.Ngithemba izihlobo zakoyihlo zizaba lakho ukukusiza. Nxa mhlawumbe zingekho, ulakho ukubikela usiyazi oyabe ekubambabamba, laye ulakho ukucela kubokhulu kumbe ogogo ezinye indlela ezingakusiza.
Umbuzo
Ngicela uncedo khulu. Ngangendile kodwa ngasuka ngoba ubaba lowo wayengihlukuluza. Ngake ngahlangana labanye kodwa hayi khathesi sengimtholile owehlukana lomkakhe sesilomnyaka sisonke. Iqiniso khulu yikuthi akukho engikuswelayo, njalo kangisoli lutho ubaba lo ulothando njalo uyangenzela konke nje owesifazana angabe efisa ukuthi owesilisa amenzele. Uhlupho khulu lusemacansini kangizwa lutho, nxa sihlangana uyazama ukungiphulula kodwa kuyala ukuthi ngithokoze. Umbuzo wami Khulu yikuthi uhlupho lukimi yini njalo ngingaluqeda njani? Umkami ngiyamthanda Khulu. Ngenzeni. Kwezinye izikhathi ngize ngifikelwe ngumkhumbulo wokuthi mhlawumbe yikho okwenza wehlukana lomkakhe. Ngiyabonga.
Impendulo
Awusatshongo mzukulu ukuba ihloka lakhe liyagamula kumbe libuthundu. Nxa kuyikuthi ihloka kaliphakami, kungabe nguye olenkinga kodwa nxa libukhali liphakama hatshi yena umsulwa ke. Kuyadingakala ukuba konke lokhu ukubeke sobala sibili. Ngezinye izikhathi inkinga kungabe ikuwe ngoba umkakho uyazama ngamandla onke ukuba akuphulule ukuze igazi litshise kodwa elakho lala lokhu liqanda mo. Kuyadingakala ukuba ubonane lezalukazi zikutshisise umzimba, ukuze owesilisa othandana laye engavele akuthinte uzwe igazi liphakama okwamagama. Kuyadingeka futhi ukuba nxa ususiya emacansini ube ngumuntu olengqondo ezikhululekileyo sibili, njalo ezibila uthando. Ungavumeli ukuya emacansini ingqondo zikhasa phakathi kwamalahle ngoba uwuzukumuzwa ubunandi bocansi. Lawe mzukulu zama ukukhulula inhliziyo yakho wamukele ubuhle omunye wakho akunikeza bona, lawe umnikeze ucansi ngenhliziyo yakho yonke ukuze laye akholise. Ungabona imbiza yabogogo isehlula ulakho ukuvakatshela laba ngesingisi okuthiwa ngama “Marriage Counsellor” balakho labo ukuxoxa lawe kuze kubanguleke ithuthuva lakho.
Umbuzo
Unjani Khulu? Ngithemba ukahle. Ngingumama oleminyaka yokuzalwa engu-34, ngicela ukubuza ngabhujelwa yindoda last year ngoNovember. Besitshadile abadala abazange bangizilise yikho-ke ngasengisiya dinga umsebenzi eGoli kodwa sengithole njalo lejaha kodwa asikaze sihlangane ecansini. Ngicela ukubuza ukuthi kumele ngihlale isikhathi esinganani ngingakahlangani lomunye owesilisa. Iqiniso Khulu yikuthi imizwa layo isingikhulela. Ngeluleka Khulu.
Impendulo
Isikhathi sokuzila siya ngemihlobo yabantu.Abanye bayaqeda umnyaka wonke bezilile sibili njalo kuthi eminye imihlobo izila izinyanga ezimbalwa nje kuphela. Awusatshongo mzukulu ukuba kwaba sizatho bani esenza bengakuzilisi. Ngezinye indlela ukungakuzilisi kungaba kuzindlela zokukukhulula ukuba lawe usungalungisa impilo yakho ngendlela oyibonayo. Njengoba kukhanya usabambe isiko nje, kuhle ukuba udinge ubabakazi wakho uke uhlafune laye udaba lolu, njalo uzwe ukuba isintu sangakini lesalapho obuwendele khona sithi zila okwesikhathi esingakanani.Njengoba ngitshilo ngaphambilini mhlawumbe ukungakuzilisi kwakuzindlela zokukukhulula kungakho dinga izizatho ezenza ungafaki inzilo.
Umbuzo
Ngileminyaka engu-5 ngendile, ngilabantwana ababili owokuqala ngamthola ngingakendi la engendele khona. Inkinga yami yikuthi umkami kamthandi umntanami, ngoba nxa evakatshile uvele nje abe lama-moods, abe ngitsho lolaka endlini. Umntanami uhlala lomama njalo uyise uyabhadala imali yesondlo. Khulu ngesikhathi sithandana ngangimvakatshela ngilomntanami engelandaba kodwa khathesi kusegcekeni ukuthi kamfuni. Lokhu lami kuyangidla ngoba mina abantwabami ngibathanda okufananayo. Umntanami uleminyaka engu-7 owakhe uleminyaka emibili.
Impendulo
Kuhle ukuba udingisise inkanda yesizondo kulokuba uhlafune elithi umkakho uzonda umntwana obengamzondi izolo lisatshontshana. Ngokubona kwami mzukulu kukhona ongakubambanga ngedlela ethokozisa umkakho. Kwesinye isikhathi kungaba yimali yesondlo somntwana ebhadalwa nguyise. Kungenzeka ukuba umkakho engabe engakuthandi lokhu, kube kanti uyabe ekhumbulela ukuba wena loyise wengane liyabonana ngasese yena engakwazi, lokhu kube sekumthelela ulaka olukhulu. Hlala laye phansi umuntu wakho lixoxe kabanzi ngesiphatho sengane, umbonise izifiso zakho laye uvumele akubonise indlela afisa liphile lengane zenu.Ungathola ukuba emuva kokuxoxisana kwenu imfulo yonke ilakho ukuhle ibanguleke, ubomvu lwenzondo lukhameke. Wena njengowesifazana fukamela izingane zonke ngokufanayo laye kuzamthelela inhloni azame ukwenza okulungileyo.
Online Reporter