admin
Buhlebenkosi Gaule
NGOLWESITHATHU kuyonale iviki iyunivesithi yeNational University of Science and Technology (Nust) ibimeme abafundi bezikolo kanye lamankampani atshiyeneyo kumcimbi we-Career Fair lapho akade bexoxisana ngezifundo ezitshiyeneyo lamathuba okuthola imisebenzi.
Kumkhosi lo bekulabafundi beyunivesithi yeNust, Nyathi High, Gifford High, King George kanye lezinye izikolo zakoBulawayo. Kukanti amankampani abekhona bekuleWorld Vision, Ingwebu Breweries, Nust, Unilever, Old Mutual, Cairns Foods, Telecel, Eset Zimbabwe lamanye atshiyeneyo.
UMnumzana Charlie Ncube onguye umkhokheli weqembu leCareer Guidance and Employment eNust uthe uhlelo lolu lwaqala ngomnyaka ka2014 ngemva kokuvakatshela eyinye iyunivesithi eseNingizimu Afrika njalo leliphupho lagcwaliseka ngemva kokulandwa ngabanye abafundi ngaloludaba.
Kumcimbi lo bekunxuswe amankampani edlula itshumi ngenhloso yokuthi babonisane labaqeqetshi.
“Inhloso yethu yikuthi nge-Career Fair siqondise njalo sifundise abafundi ukuthi bazi ukuba ngemva kokuqeqetsha lapha baqonda ngaphi yikho nje sinxuse amankampani atshiyeneyo ukuba azochasisa ukuthi benza msebenzi bani lokuthi abafisa ukusebenza kiwo kumele babe benze ziphi izifundo njalo kumele babe bephumelele njani,” kuchasisa uMnu Ncube.
UMnu Ncube uthe iyunivesithi yabo ifisa ukuba lobudlelwano obuhle lamankampani atshiyeneyo ukuze abafundi abaphuma kiyo bathole imisebenzi emankampanini la.
Abafundi akade bekulo umkhosi abaxoxe loMthunywa bathe inhlelo ezifana lalolu ziyabaphathisa kakhulu ukuze bazi ngemisebenzi abafuna ukuyifundela.
“Siyajabula ngoba kumkhosi lo sithole ulwazi olujulileyo ngemisebenzi etshiyeneyo esilakho ukuyenza. Mina bengifuna ukuzwisisa ngeze-electronics, sengihlonyiswe ngaphelela,” kutsho umfundi lo oweNyathi High School.
Omunye umfundi weNust, uLeeroy Kazembe uthe umkhosi lo umphathise kakhulu ngoba ubone enye inkampani enza umsebenzi ngalokhu akufundelayo.
“Bengingakwazi ukuthi kulenkampani ethiwa yi-AMG Global, kodwa khathesi sengikwazi njalo ngizakuyadinga umsebenzi ngingaqeqetsha,” kutsho uKazembe.
Umcimbi lo uphinde wanika abamankampani ithuba lokuthengisa impahla kanye lokunye abakwenzayo (services).
UMnu Ncube uphethe ngokuthi bafisa ukuthi kumnyaka ozayo kube lamankampani amanengi emcimbini lo.
Online Reporter