Online Reporter
Nkosilathi Sibanda
UNKOSAZANA Agnes Nomngoma Mabhena, weSouth Africa usekhuthaze abaNsundu, ikakhulu isizwe samaNdebele ukuthi kumele simanyane ukuze kube lokuzwisisana lokugcinwa kwamasiko.
Ukhulume lokhu ekumkhosi weMiklomelo kaDakamela oqhutshwe ngempelaviki edluleyo. UNkosazana Nomngoma ubeyingxenye yequla lamalunga eNdebele Kingdom akade enxuswe koDakamela, eNkayi, eMatabeleland North.
Umbuso wamaNdebele la, ungaphansi kweNkosi uEnock Makhosonke II Mabhena esabelweni seMpumalanga, eSouth Africa.
UNkosazana Nomngoma uthe amaNdebele ahlala kuleli, lalawo adabuka eSouth Africa ngabantu banye.
“Njengabantu base-Africa, simunye loba sisehlukaniswa yimingcele. AmaNdebele akhona lapha eZimbabwe ngabantu bakithi. Silapha ukuze sifunde ebantwini bakulindawo, siphinde sifundisane ngamasiko ngoba amasiko lenkolo zethu ziyafana,” kutsho uNkosazana Nomngoma.
Uqhubeke wathi: “Njengomdeni wakoMabhena sizizwa sihloniphekile ngokumenywa ukuthi sibe yingxenye yomcimbi wenduna uDakamela walonyaka.
“Besingeke sekele ukuza lapha ngoba sikhuluma ngokuthi singobani njengabantu njalo umcimbi lo ngowokwamukela isiko lethu.”
UNkosazana Nomngoma ngudadewabo weNkosi uMakhosonke.
Abanye abakade bekhona emcimbini bevela eSouth Africa, yiNkosana uSiyabonga Mabena olilunga leManala-Makerana Traditional Council, othe bayakuthokozela ukunxuswa koDakamela. Uthe minyaka yonke ngoMabasa bahlala bebuya kuleli bezovakatsha.
“Minyaka yonke ngoMabasa sihlala sivakatshela koBulawayo sizojabulela impilo yenkosi engasekho uMakerana Mabena owafika eNyathi esaphila ezolandela abanye abantu bakoMabhena abakhona lapha eZimbabwe. Wedlula emhlabeni esazama ukuhlanganisa abakoMabhena kweleSouth Africa leZimbabwe.”
