Online Reporter
Ethel Ncube
USODOLOBHO wakoBulawayo usethule izikhalazo zedolobho lakoBulawayo afisa ukuthi uNkulunkulu angenele kuzo ukuze liye phambili.
USodolobho, uDavid Coltart wethule izicelo lezi ngoLwesibili kumhlangano weDay of Prayer and Thanksgiving obuse City Hall.
Kumhlangano lo obuhanjelwe nguMphathintambo obona ngokwenzakala koBulawayo uKhomuredi Judith Ncube, amakhansila, abafundisi bamabandla ehlukeneyo kunye lezakhamizi zakoBulawayo bekuzobongwa izulu elanayo kusigaba esedluleyo sokulima.
USodolobho, uColtart uthe idolobho lakoBulawayo lilenhlupho ezimbalwa ezidinga uxhaso lwalabo abafisa ukulincedisa.
“NjengoSodolobho wakoBulawayo, ngilezikhalazo eNkosini, esokuqala, eNcema sisebenzisa impompi ezintathu kuphela okwenza kubenzima ukuthi amanzi atholakale ngendlela efaneleyo.
“Sikhulekela ukuba sithole usizo kwabangasithengela impompi lezo esizidingayo ezokudonsa amanzi. Esilazo sezindala,” kutsho uSodolobho.
Uqhubekele phambili wathi isicelo sakhe sesibili yikuthi ibhajethi yakoBulawayo yamukelwe.
“Okwesibili ngilesicelo sokuba ibhajethi yedolobho lakoBulawayo yekhansili ithole imvumo kuHulumende masinyane ukuze senelise ukusebenza ngendlela efaneleyo.
“Okwakhathesi asenelisi ukusebenza kuhle ngenxa yokuba ibhajethi yethu kayikamukelwa phezulu kuHulumende,” kutsho uColtart.
UMphathintambo wakoBulawayo, uJudith Ncube, uthe izakhamizi zingaxabani ngohlupho lwamanzi kodwa kabakhulekele ukuthi kutholakale imali yokuthenga impompi ezintsha.
“Abantu lingaxabani ngohlupho lwamanzi olukhona lapha koBulawayo kodwa asihlanganiseni amakhanda sikhulekele ukuthi sithole usizo lokuthi sithenge impompi lezo ngoba yiyo kuphela indlela yokuthi udubo esilalo olwamanzi luphele.
“Impompi esilazo sezindala azisenelisi ukuba uBulawayo athole amanzi ngendlela efaneleyo,” kutsho umphathintambo uJudith Ncube.
Umhlangano lo wenziwe ngesikhathi amanye amalokitshi afana lePumula, Tshabalala, Pelandaba, lamanye esedonse phose inyanga engelamanzi.
