admin
Silo Cornelius Luphahla
ABADALA babengasomi nxa bethi imbiza ibila ngokukhwezelwa njalo amathole akhethwa kusakhanya ngakho ngilethemba lokuthi bafundi lonke elizabhala imihloliso lonyaka liyilindile.
Lapha ngichaza ukuthi selibophe zaqina njalo lokhu liqhubekela phambili ngokubala njengoba ithuba selisondele.
Ngiyazi abahlakaniphileyo baqala kudala ukubala, khathesi sebezitshaya amakhanda sezazifela kudala.
Njengoba nje kuvunwa okuhlanyelileyo kuqakathekile bafundi ukuthi libambe ngamandla kusasekhathesi ukuze mhla ithuba lemihloliso lifika lilithole lizimisele njalo kungabi khona ozakhala mhla impumela yemihloliso le iphuma.
Isimanga yikuthi inengi labafundi lisuka lithathe isikhathi sokufunda lisenze esokudlala lisuke lapho likhangelele impumela enhle lona lenze kubi. Uthola abafundi behlezi amabholohweni ngesikhathi sesikolo bengagqize qhakala, okusuka kumangalise ukuthi bathembeni.
Ngethuba impumela yemihloliso le siphumile uthola umfundi sesesaba lokuyathatha eyakhe khona kunguye owabhalayo. Asazi kumbe ngethuba edlala uyabe ethi akusoze kufike ithuba lempumela yemihloliso le. Bafundi sebenzisani isikhathi lesi elisiphiweyo ngoba isiphetho kuba yikubhebha okuyikuthi lizakhala mhla impumela yezifundo yemihloliso yenu iphuma nxa lidlala.
Ngemva kwempumela le uthola umntwana sehawula sehlupha abazali ethi ucela ukubuyela esikolo ngoba esebona ukuba isimo sesisibi. Angazi kumbe bantwana likholelwa esitshweni sabadala esithi imitha ngokuphindwa.
Usizi yikuthi umntwana engehluleka esikolo uhle azidele uthole intombazana sihlanyisana lamaxhegu alamakhosikazi awo ithi idinga indawo yokufihla ikhanda. Asazi ukuthi umuntu engafihla njani ikhanda khona kulelomunye? Amajaha uwathola setshona elandelana lemizi elotshwala angathi zinkalakatha zamaxhegu kuthi asemadolobheni ayabe sethwalise nzima abantu ngokubantshontshela.
Bafundi zamani ukubamba ziqine kusasekhathesi ngoba sesikhathele thina ngamasela. Fundani ukuze libe ngabazali abaqotho bakusasa abazafundisa abantwababo isizwe sethu sithuthuke. Ngiyazi abanye basuka bephulele izinti endlebeni nxa betshelwa ngokuqakatheka kwesikolo, ngakho isala kutshelwa sibona ngomopho.
Kuhle kulowo ozawembatha amazwi ami enkuthazo ngoba uzazakhela ikusasa lakhe elihle elilokuthula njalo lebhayibhili liyatsho ukuthi othanda ukulaywa uthanda ukwazi. Bazali khuthazani abantwana ngokuqakatheka kwemfundo ngoba imfundo iqukethe ubuntu kanye lokuthula. Imfundo ingumthaphi wolwazi lenhlakanipho, ivula ingqondo ibone ngokutsha.
Mthwakazi kaNdaba, sengitshaye kwenela njalo ngiyiphosile induku ebandla ngakho ngilethemba lokuthi umfundi uzwile kodwa amahlongandlebe azizwela ngikhuluma isiYemujakala ulimi lwamazimu. Kodwa asazi njengoba bethi umfaba uyazalwa yinhlanyelo ekhethiweyo, pho engakhethwanga ke? Asazi, sizathi lidube ngamabala sethe bha!
Online Reporter