admin
KULENINA elileminyaka yokuzalwa engu-43 eligwaze labulala uBen 10 walo ngemva kokukhandwa lilomunye uBen 10.
UBen 10 lo, uSiphiwe Tshabalala (29) ugwazwe yitshamali yakhe le ngoLwesibili kuviki ephelileyo.
Kubikwa umuyi ngesikhathi efica itshamali yakhe le ilomunye uBen 10 waqala ukulwa okuyikho okwabangela ukuthi agwazwe afe.
Ngemva kokubulala itshamali yakhe umsolwa kubikwa unyamalale okwamalanga amabili kodwa wasezinikela emapholiseni eTembisa.
Izihlobo zikaTshabalala zikhulume ngokudabuka okukhulu zisithi zifuna umsolwa ayefela ejele ngoba wenze into embi kakhulu ngokubulala umntanazo.
Udadewabo kamsolwa uNkosazana Sina Rantho uchaze njalo ukuthi umsolwa wayengelandawo yokuhlala wasizwa nguTshabalala.
“Wayengela ndawo yokuhlala wasethathwa nguSiphiwe wahlala laye kodwa khathesi isimanga yikuthi sembulele yena wayemsiza,” kutsho uRantho.
Uqhubeke njalo wachaza ukuthi izihlobo zikaSiphiwe zazingafuni ukuthi athathe umsolwa, zimzonda ngoba emdala.
“Umsolwa wayemdala kakhulu kuloSiphiwe ngakho sasizama ukumtshela ukuthi amtshiye yena esala. Wathi wazama ukuthatha umuntu omlingeneyo kodwa bonke babengathembekanga emtshadweni yikho waze wakhetha utshukela mama lo ngoba ecabanga ukuthi sekhulile ngakho ngeke enze okufanayo.
“Manje isimanga yikuthi lo kasazange wamqila kodwa uhle wambulala,” kutsho uNkszn Rantho.
UNkszn Runtho ubuye njalo wachaza ukuthi umsolwa lo wayebuye labantwabakhe ayebazale lendoda eyayimthethe ngakho labo bebegcinwe nguTshabalala. — Ubulembu
Online Reporter