Online Reporter
Nkosilathi Sibanda
AKULA okukhulu okujabulisa uKelvin Kaindu ngaphandle kosekelo aluthola kubalandeli beHighlanders.
Umqeqetshi lo uthe usekelo abalutholayo lwenza abadlali babe ledlabuzane lokuzethemba enkundleni. UKaindu ukhulume lokhu, ebabaza ukuthi abalandeli beqembu yibo abadala utshintsho emidlalweni ngakho uyakuhlonipha lokhu.
“Siyabonga kubalandeli beqembu abahlala besigqugquzela kumidlalo yonke, loba sisekhaya kumbe sisemangweni.
Okumele sikufunde ngokuphangisa yikuhambelana labo. Nxa besikhuza, lathi kumele sidlale ibhola elihlabusayo, siliqhube sihlohle.
“Sayibona indlela abasisekela ngayo eHarare lanxa iYadah yayiwuphethe umdlalo. Sesibonile njalo ledlabuzane elifanayo kwezinye indawo kunye losekelo olukhulu kakhulu eBarbourfields.
Umqeqetshi lo, wabika phambilini ekuqaleni kwesizini yeCastle Lager ukuthi wakha iqembu elizancintisela inkezo kuligi.
Uthe iHighlanders ilomlandu kubalandeli bayo owokuthi idlale ngezinga eliphezulu, nanko ngomnyaka ozayo iqembu lizabe lithakazelela iminyaka elikhulu lasungulwa.
“Inhloso yethu yikugubha iminyaka engu-100 ngomnyaka ozayo ngokuletha ukujabula kubalandeli bethu. Okumqoka khathesi yikwakha iqembu elizajabulisa abalandeli njengoba sithakazelela iminyaka elikhulu,” kutsho uKaindu.
