Online Reporter
Fungai Muderere
Lo owabika ukuthi imali ngeke ijabulise umuntu, wayejombile!
Amazwi la athinta abalandeli bonke beqembu leHighlanders asebevuleke amehlo, bakubona ukuthi kumele bamukele ngazo zonke imali losekelo oluvela kusomabhizimusi uWicknell Chivayo.
Kulandela ukukhonona lokubeka imibono ebigcona isenzo sikaChivayo, abalandeli baleliqembu lenguqu elakoBulawayo kunye lenkokheli zethimu, sebefake isibongo esikhulu, bebika ngobuhle benhliziyo kaChivayo.
Isibongo lesi sethulwe ngokuzithoba okukhulu ngumgcinisihlalo weqembu, uKenneth Mhlophe.
“Siyambonga uSir Wicknell Chivayo ngesenzo sakhe. Ngimele iqula le-executive, abadlali, izisebenzi kunye labalandeli, ngithanda ukwethula isibongo sethu kulandela isipho sosekelo lwemali lomqeqetshi okuvele kuSir Wicknell Chivayo.
“Sithi sibusisiwe esiphayo njalo uNkulunkulu kandise lapho okuphume khona. Siyabonga,” kutsho uMhlophe.
Umgcinisihlalo lo uthe kwelabo uhlangothi bazasebenzela ukuthi usekelo lukaChivayo lulethe impumelelo eqenjini.
“Lokhu okuvele kuSir Wicknell Chivayo Fund kuze ngesikhathi esifaneleyo. Senelise ukubhadala izikwelede ebezikhona kusukela ngesizini ka2022 kusiya kusizini ka2024.
“Sithembisa ukuba yonke imali izasetshenziswa lapho okumele isebenze khona. Kungumlandu wethu sonke ukuphatha kuhle lolusizo.”
UMhlophe ubonge njalo labanye abaxhasi babo abagoqela iSanctuary Insurance Company, Business Friends of Bosso, CBZ labanye, ebika ukuba benelise ukuthi baqinise ubudlelwano obukhona.
“Amalunga ethu akhuthazwa ukuthi asekele inhlelo ezethulwa ngamankampani la ikakhulu ukuthola i-insurance lamachence kuSanctuary. IBusiness Friends of Bosso iqhubeka ngokunikeza isicoco senyanga kumdlalo owenze kuhle. Ingxoxo leCBZ mayelana lohlelo lwekhasi lebhanga ziyaqhubeka,” nguMhlophe lo.
