Online Reporter
Fungai Muderere
UMQEQETSHI weDynamos uKelvin Kaindu useveze ukuthi bazahlala emkhulekweni, bedinga ukuthi bangatsheleli baphume kuPremier League.
Lokhe wafika kuDynamos, uKaindu kakanqotshwa. Ngempelaviki edluleyo, umqeqetshi lo, ubone iqembu lakhe lidlala kakuhle, okuveze ukuthi kuyathembisa ukuba inganamathela, iphenduke kwezinkulu nxa ingaqhubeka ngegiya lokunqoba.
Iphethe kuyi 1-1 leNgezi Platinum. UKaindu uthe nxa belokhe bethola imiklomelo, kuzakuba ngcono ekucineni kwesizini. Ubike ukuba uthethe ikhefu kancane, wavakatshela eZambia, okuyilapho okulekhaya lemuli yakhe.
“Ngisanda kuthatha insuku ezimbalwa zokuphumula, ngisanda kufika eZambia kodwa engingakutshela khona yikuthi silomsebenzi omkhulu kuDynamos. Imidlalo yethu emine yokucina ibalulekile kakhulu ukuze isisuse ezembeni.
“Ngemva kwalokho singaqala sikhulume ngesizini entsha. Sizaqhubeka ngokukhuleka amalanga wonke. Yikho okulethemba lethu,” kutsho uKaindu.
“Ngibonga ukuthi sathola umklomelo kuNgezi Platinum. Singaqhubeka kanje, akwaziwa, singazibona sikhona kuligi.”
Okwakhathesi amaGlamour Boys abambelele kunombolo yesi-15, ephethe imiklomelo engu-33, elingana leChicken Inn, Triangle leBikita Minerals.
Kusenjalo, esiqongweni kuhlezi iScottland ilemiklomelo engu-59, kulandela iSimba Bhora ele-55.
Umqeqetshi weScottland uTonderayi Ndiraya uthe kumele babezintshantshu. IScottland iyachinsa ukudlala kuPremiership.
“Khathesi ngeke sikwazi ukukufihla ukuthi sihlose isicoco seligi. Sidinga ukuba zintshantshu. Sizasebenza sikhangele ukuthi iSimba Bhora idonsele emuva. Balomdlalo owodwa okhona njalo sizaqhubeka sibaqaphele,” kutsho uNdiraya.
Linye iqembu elizama ukuthi libeyintshantshu ngeleMWOS, elinqobe iGreenfuel nge 1-0, laqansa lathola imiklomelo engu-55, ilingana leSimba Bhora. Kunombolo yesine kuhlezi iNgezi Platinum ile-55.
