Siyayinqoba iSouth Africa — Nqobizitha

YiNtatheli kaMthunywa
UMDLALI weHighlanders ophinda atshibilikele isizwe kuma-Under-23 uNqobizitha Masuku osanda kunikezwa ithuba lokudlalela iqembu lamaYoung Warriors uthe iSouth Africa kayisoze yalibona elangeSonto ngoba bazimisele ukuyinqoba kumdlalo wokungena kumncintiswano weCaf.

Amaqembu womabili aqeda ihlandla lakuqala engutshiki lobhanqa 1-1 enkundleni yeRufaro kumaviki amabili adluleyo.

“Angiboni ukuthi singehlulwa yini ukuthi siqedelane leSouth Africa ngeSonto. Isizwe sithembele kithi ngakho ngeke sidanise, lathi sizasebenzela ekhaya.”

UMasuku ukhulume lokhu ngesikhathi esuka koBulawayo elubhekise esigodlweni lapho amaWarriors azalolonga ngaphansi komqeqetshi uCallisto Pasuwa.

Umdlalo lo uzakuba seRustenburg.

UMasuku ubike ngokuthaba okukhulu ngokukhethwa kwakhe wathi sekutshintshe umdlalo wakhe loba nje esefuna ukuthola imidlalo eminengi.

“Sengikhulile kulumdlalo. Ukukhethwa ukuthi ngidlalele isizwe kuyisibusiso. Banengi abakade bekhala ngokuthi kungani kuthethe isikhathi eside, kodwa mina ngithi lesi yiso isikhathi esifaneleyo,” kutsho uMasuku.

UMasuku ucele ukuthi izizalwane zakuleli ezisebenzela eSouth Africa zize ngobunengi bazo ukuzosekela iqembu.

“Abasekeli bamaWarriors ngiyazi ukuthi bagcwele amadolobho wonke eSouth Africa. Ababuye bezosisekela ukuze lathi sibeledlabuzane.

Kusenjalo imbiko ephuma ebulenjini ithi iSouth Africa izimisele nanko ayizange isuke enkambeni kusukela yadlala eRufaro.

Kuthiwa isizwe lesi silolonge siseDurban andubana siqhubeke sisenkundleni yeRustenburg.

Abadlali abakhangelelwe ukukhethwa:
Tatenda Mukuruva, Blessing Moyo, Carlos Rusere (Dynamos) Teenage Hadebe, Nqobizitha Masuku, Thomas Chideu, Knox Mutizwa (Highlanders), Marshal Mudehwe (FC Platinum), Lawrence Mhlanga, Raphael Kutinyu (Chicken Inn), Donovan Bernard, Mgcini Sibanda (How Mine), Chris Mverechena, Caps United, Philana Kawedere (Harare City), Pritchard Mpelele (Hwange), Jimmy Konono (Whawha) Farai Madhananga (Flame Lily), Gerald Takwara (Tsholotsho), Malvin Gaki (Triangle), Wisdom Mutasa, Walter Musona (FC Platinum) Kuda Mahachi (Mamelodi Sundowns, South Africa), Marvelous Nakamba (Vitesse, Netherlands), Ronald Pfumbidzai (Hobro IK, Denmark).