‘Siyaziqhenya ngamasiko ethu’ . . . IBulawayo Arts Festival ibambana lomkhosi wamasiko

Nkosilathi Sibanda

NGONHLANGULA idolobho lakoBulawayo lizaqhuba umkhosi omkhulu wokunanza amasiko lemidlalo yesiNtu.

Kuzabuthanwa kunanzwa iNational Culture Month leBulawayo Arts Festival (Baf), okwakuqala kuhlanganiswa imcimbi yomibili le kulelidolobho mhaka 3 Nhlangula.

Ngokujwayelekileyo, abantu bazakuthi gwaqa enzikini yedolobho kusethulwa imbiko lezifundo ngamasiko, indimi lokunye okuphathelane lempilo yabantu abaNsundu. Njengoba isabelo sakoBulawayo sihlanganisa abantu abanengi abalamasiko atshiyeneyo, umkhosi wokugubha amasiko uzakuba mkhulu njalo wehlukane leminengi ekhona kwezinye indawo elizweni.

Ilizwe linanza amasiko ngenyanga kaNkwenkwezi. Umkhosi omkhulu elizweni ungoLwesine eRusunguko Clinic, eChiredzi, esabelweni seMasvingo, ngaphansi kwenduna uTshovani.

Umkhosi lo uvulwe ngokusemthethweni nguMongameli welizwe u-Emmerson Mnangagwa.
Indikimba yomkhosi lo ithi: “Ukuthakazelela amazwi omdabu”.

Kuzaphakanyiswa amasiko akuleli, kukhuthazwe izizalwane zonke ukuthi zamukele, ziphinde zihloniphe ukuba khona kwendimi ezingu-16 ezigoqela isiNdebele, Chewa, Chibarwe, isiLungu, Kalanga, Koisan, Nambya, Ndau, Shangani, Shona, Sign Language, Sotho, Tonga, Tswana, Venda lesiXhosa.

Inhlanganiso yeNational Arts Council of Zimbabwe ibike ukuba ikhethe ukuthi ihlangane labaqoqi beBulawayo Arts Festival ukuze kube lomcimbi owodwa, omkhulu, otshengisela ukubambana kwezokugqugquzela amasiko.

Umaneja weNACZ esabelweni sakoBulawayo uCleopatra Dube utshele iphephandaba likazulu ukuthi umkhosi wesabelo lesi uzavulwa ngokusemthethweni nguMphathintambo weDevolution and Provincial Affairs koBulawayo uJudith Ncube.
“Njengoba umkhosi wokunanza iCulture Month elizweni ubungoLwesine, sikubone kufanele ukuthi owethu esabelweni wenziwe kanye kanye loweBulawayo Arts Festival,” kutsho uDube.

Uthe abantu kabakhangelele ukukholisiswa ngabacula lamaqembu emigido yesiNtu lokuthola ulwazi ngamasiko lokunye okufanayo.

Kuzanxuswa amaqembu alodumo koBulawayo lakundawo ezikumhlubulo ongezansi yelizwe agoqela Umkhathi Theatre, Khaya Arts, Bambanani Arts Ensemble, Umthwakazi Kandaba, Woza Africa lamanye.

Umqondisi weKhaya Arts uFuture Dube uthe: “Asihlanganeni sonke, sizokholisa siziqhenya ngobuntu lobuyithi bethu.”