Online Reporter
Ukuzwisisa loku funda indatshana elandelayo.
Ngathi ngihamba phakathi kwegusu elikhulu elilezihlahla ezinde ezitshaya khonale ngezwa ngisesaba kakhulu. Ngafisa ukuthi nga umnewethu omdala uhamba lami lapha ukuze ngingesabi.
Yena phela yisiqhwaga sendoda emfitshane kodwa elamandla amakhulu.
Izintombi ezintsha zimthandela ukuthi yindoda enhle engamadoda amabili inye.
Kuloludatshana, nanzelela amagama asetshenziswe ukuchaza amabizo lezabizwana njengala; elikhulu, ezinde, omdala, emfitshane, amakhulu, ezintsha, enhle, amabili.
Amagama la athethwe endabeni yonale engaphezulu athiwa yizichasiso.
Isichasiso ligama elichaza usobizo emutshweni njalo limlandela. Usakhumbula yini mfundi ukuthi nxa sikhuluma ngosobizo siyabe sisitsho ibizo lesabizwana?
Isichasiso silengxenye ezimbili: isivumelwano lesiqu. Izivumelwano yizakhi esiqalisa ngazo ezichasisweni.
Izivumelwano lezi yizo ezidala umehluko phakathi kwezichasiso eziyimihlobo etshiyeneyo. Mine imihlobo yezichasiso (a) Isiphawulo (b) Isibaluli (c)Inani (d) ubumnini.
Kufanele kube lokuvumelana phakathi kwesivumelwano sesichasiso losobizo ochazwayo.
Khangela izichasiso ezikhethwe endatshaneni eziphezulu:
Igusu elikhulu, izihlahla ezinde, umnewethu omdala, indoda emfitshane njalonjalo.
