Online Reporter
Ethel Ncube
KULENDODA yakoBulawayo ebotshelwe ukutshaya enye ngesitina yafa kubangwa intombi.
Umuyi uPhumulani Moyo we-Surbubs oleminyaka engu-38 yokuzalwa kubikwa waxabana loBrian Moyo oleminyaka engu-25 kubangwa intombi.
Kuzwakale ukuthi mhlaka 11 Ntulikazi uBrian Moyo waxabana loPhumulani kubangwa intombi.
Kubikwa ngokuzonda umetheswacala wadobha isitina watshaya uPhumulani esiphaqeni wawela phansi waqaleka.
Omakhelwane babiza i-ambulensi yamthwala yamusa esibhedlela lapho afika alaliswa amalanga athile wesedlula emhlabeni.
UBrian ubotshwe ngemva kokuba indaba le ibikelwe amapholisa.
Intatheli ixhumane lomsekeli wesikhulumi samapholisa koBulawayo uAssistant Inspector Thandekile Ndlovu obike ukuba indaba le, ichwayisiswa ngamapholisa.
“Sibophe umetheswacala uBrian Moyo osolwa ngecala lokubulala uPhumulani Moyo. Amapholisa athanda ukuxwayisa uzulu ukuba atshiyane lomkhuba wokulwa kodwa alungisise ingxaki ngokuthula,” Asst Insp Ndlovu.
Kusenjalo kolunye njalo udaba lwengxabano yentombi, kulendoda eleminyaka engu-18 yokuzalwa emiswe phambi komthethwandaba weWestern Commonage koBulawayo isetheswa icala lokuzama ukubulala kulandela ukugwaza umfana oleminyaka engu-15 yokuzalwa.
Umsolwa uQhawelenkosi Mnkandla, ohlala elokitshini leNkulumane, uzaphenduka emthethwandaba mhlaka 8 Ncwabakazi, 2025.
Umatshi uNkosikazi Sibongile Marondedze uthe umsolwa akumelanga akhulumisane labafakazi njalo aqhubeke ehlala kukheli esezandleni zenkundla njalo ngoLwesihlanu maviki onke aye emapholiseni enkambeni yeNkulumane.
Umtshutshisi kulelicala uMnumzana Milton Moyo, uthe mhlaka 19 Ntulikazi emavinkilini akoSokusile, umamangala wasuka esiya-downloader umsebenzi wakhe wesikolo umsolwa wamlanda wafika wambuza ngobudlelwano bakhe lentombi ethile.
Ababili laba baxabana, uMnkandla wakhipha ingqamu wagwaza umamangala esifubeni esandleni senxele.
Umamangala walimala okwabangela ukuthi ayelaliswa esibhedlela seMpilo koBulawayo.
