marble nkomo
Innocent Kurira
UMDLALI wamaWarriors ongene esuka ebhentshini, uJunior Zindoga, usebenze kuhle enkundleni, okubangele ukuthi iZambia izihlohle, okwenze iZimbabwe yanqoba nge 1-0 emdlalweni wokucina weMukuru Four Nations Cup.
AmaWarriors abe lesigaba sokuqala esinzima emdlalweni njengoba iZambia ibiphethe umdlalo njalo ibathwalise nzima. Ngesikhathi sekhefu, bekungutshiki lobhanqa 0-0, ikanti ukaputeni weZambia, u-Abraham Siankombo, ubeyinkinga enkulu kubagadli beZimbabwe.
Kube lesikhathi lapho iZimbabwe ecabange ukuthi isihambe phambili, kodwa unompembe walile ibhola likaMacauley Bonne, alichaze ngokuthi libe yi-offside.
IChipolopolo iqhubekile ngokuhlukumeza amaWarriors, kodwa ukuvimba kweZimbabwe kuqine ngamandla emuva.
Kusigaba sesibili, amaWarriors azamile ukudinga ibhola phambili kwegedi leZambia ngesikhathi u-Emmanuel Jalai ekhaba ibhola elilamandla kodwa labanjwa kalula ngunozinti weZambia.
UBonne loBill Antonio labo bathole amathuba, kodwa unozinti ubengavuzisi. Umdlalo utshintshe ngesikhathi uSelemani ekhitshwa, kufakwa uJunior Zindoga ngomzuzu wesi-64.
Umdlali lo ongene esuka ebhentshini, ube lomthelela omkhulu, umsebenzi wakhe wanceda kubhola elizitshayelele kumdlali weZambia ngomzuzu wesi-88, iZimbabwe yanqoba nge 1-0.
Abalandeli bamaWarriors bebengene ngobunengi enkundleni. Kuthe kuphela umdlalo bajabule kakhulu iqembu lisetheswa isicoco sokuba zintshantshu zeMukuru Four Nations Cup.
Umqeqetshi weZimbabwe, uMarian Marinica, uthe: “Leli linyathelo elihle kithi, siyaphambili. Bekungumdlalo onzima, iZambia isithwalise nzima, kodwa lathi siwatholile amathuba.”
Emdlalweni wokulwela indawo yesithathu leyesine, iBotswana inqobe iMalawi nge 1-0.
Online Reporter