admin
Charity Moyo
SIZIHILELE isalukazi sesigabeni seMwenezi ngaphansi kweNduna uMazetese ngenxa yehlazo lokuhlahlulwa ubuthakathi emphakathini.Isalukazi lesi uSakhile Ncube (56) ohlala esabelweni lesi senze isiga lesi ngeviki ephelileyo kuleyondawo.
Iphephandaba likazulu liyakuveza ukuthi izakhamizi zakulesisigaba bezithwele amagabha avuzayo ngamashwa abezehlela njalo nje. Lamashwa abalisela ukufa kwabantu okungazwisisekiyo kanye lokunyamalala kwabantwana kungaziwa lapho abatshone khona.
Usobhuku wakule indawo owayekhona mhla kuhlahlulwa umuyi uveze ukuba izakhamizi besezithwele amagabha avuzayo.
“Lezi zehlakalo beziyinsindabaphenduli njalo zisethusa wonke umuntu wakule indawo kanye lalabo esakhelane labo,” kutsho usobhuku Pedzi obizwa ngegama elithi Johannes Gwelegwele.
Kuzwakale ukuthi ngenxa yeziga lezi, izakhamizi zabopha isu lokudinga inyanga ukuze izodinga imbangela yenkinga lezi ibuye yephule isigaba kulumlilo esasiphakathi kwawo.
“Ukudinga kwethu inyanga bekuyikuzama ukuthola indlela yokuhlanza isigaba sakithi lokulwisana lokuganga obesekubhahile,” kwengeza usobhuku Pedzi.
Inyanga le eyayibizwa ngelithi Jeremiah Sibanda eyayivela eZaka yabuthanisa uzulu, yahlahlula umuntu wonke.
Ekungeneni kukaMoyo enkundleni yokuhlahlulwa inyanga le yakhwaza yavumbulula imfihlo yomunye umntwana wesigabeni owanyamalala ngomnyaka ka1993 ngesikhathi elusile labangane bakhe emadlelweni.
“Umntwana lo wadingakala yonke indawo kodwa akukaze kwatholakala ngitsho wona umzila wakhe. Sethuka sesisizwa ukuthi uNksz Moyo nguye owayebangele ukunyamalala komfanyana lo.
“Inyanga yaveza ukuba lumntwana wayengafanga kodwa wayesetshenziswa ukuba ngumkhoba wesalukazi lesi.
‘’Kafanga umntwana kodwa waqunywa ulimi wafakwa esiphaleni ukuze abengumatholwane wesalukazi lesi,” kulandisa usobhuku Pedzi.
UMoyo uthe ekuzwa lokhu kazange waphikisa kumbe ukuzama ukuzigeza kodwa wathi khwatshu wahlaba ngejubane watshiya umphakathi unkemile.
Ngemva kwemizuzu ethile amadoda athile amxhuma ngokuthukuthela okukhulu kodwa basebengemva kwesikhathi nanko phela bathola eselenga esihlahleni soxakuxaku esisegumeni lakhe.
Imizamo yokukhuluma lesikhulumi samapholisa eMasvingo yehlule.
Online Reporter