admin
NguNkosilathi Sibanda
IQEMBU leTsholotsho FC liqabuka ukungena eBarbourfields kumdlalo walo leHighlanders ngeSonto.Umdlalo lo ulakho ukuhlabusa ngoba kungqikilana amathimu amabili alosekelo olukhulu kulumhlubulo welizwe.
Ukunqoba kweZiqholo zeZhwane kumdlalo wazo wokuqala leHarare City 1-0, kufake ithimu le idlabuzane, kwakhwezela abasekeli balo abakholwa ukuthi bazayichumisa iHighlanders ngeSonto.
Omunye wabasekeli beZiqholo usikhwicamfundo uJonathan Moyo ubike ukuba iTsholotsho FC iyababa lonyaka.
Umphathintambo kaHulumende kugatsha lwe-Information, Media and Broadcasting Services lo ngumsekeli weTsholotsho ongathandabuzwayo.
USikhwicamfundo uJonathan Moyo useveze ukuthi iqembu leTsholotsho FC liyababa.
“Amhlophe Ziqholo zeZhwane! Selihle laqala isizini ngokuba phezu kwengalani yePSL. Akulamhlolo ongedlula lo.
Kuyamangalisa lokhu!” La ngamazwi kaSikhwicamfundo Moyo, ebulenjini bukaTwitter.
UMoyo uveze njalo ukuthi uselethemba kubafana bakhe beTsholotsho ngemva kokunqoba kwabo iqembu leHarare City.
“Ngiyazi ukuthi kungaba nzima kuligi yePSL kodwa abafana bakhombise ukuthi bazimisele,” kutsho uMoyo.
Ngemva kokuhlalisa phansi iqembu leHarare City nge 1-0 enkundleni yeRufaro ngoLwesihlanu, labalandeli bamanye amathimu bayitshayele ihlombe iTsholotsho.
Lakanye iqale isizini yeCastle PSL ngesivuvu iTsholotsho kungela ocabangela ukuthi ingayangisa iHarare City.
IHighlanders yona iphethwe luvalo ngokudibana leZiqholo zeZhwane. Umqeqetshi wayo uBongani Mafu uyakubika lokhu.
“I-Tsholotsho FC iqinile njalo ithembe isiqubu sabadlali bayo abasakhula. Ithimu yami ilodubo lokulalisa ingqondo emdlalweni.
“Kumalungiselelo ethu omdlalo wangeSonto sizakhuthaza abafana bethu ukuthi bahlakaniphele Kumele siyitshaye iTsholotsho,” kutsho uMafu kuliviki.
UMafu, nxa ezimisele ukuyinqoba iTsholotsho FC, imvimbi zakhe kumele zivale ngci. Abagadli beTsholotsho uSimbarashe Gorogodyo, uKudzanani Machazane, uLynoth Chikuwa loEricko Phiri balakho ukuhlukumeza phambili kwenkundla.
Abanye abadlali okumele bananzelelwe yiBosso nguDonald Dzvinyai, uCalvin Moyo, uMacClive Phiri, uRicky Tatenda Bota loNkosilathi Moyo.
Omunye umsekeli weTsholotsho omutsha uThomas Madhuku weHarare uncome kakhulu iqembu leli wathi ulifisela inhlanhla kumdlalo walo leHighlanders.
Online Reporter