admin
Nkosilathi Sibanda
Amakhansila akoBulawayo asevumelane ukuthi mhla iligi yenguqu iqalisa, amaqembu wonke akoBulawayo azasebenzisa inkundla zayo mahala.
Kubikwa amalunga ekhansili la athe amaqembu akuligi ephezulu kanye lalawo aku-Division One, awasoke akhiphe inhlawulo okwemidlalo emihlanu ilandelana.
Lokhu kwenzelwe ukuthi amaqembu athole imali nanko aseqede umnyaka engelamali ngenxa yokumiswa kwemidlalo okwadalwa yi-Covid-19.
Amaqembu enguqu kuleli, ikakhulu kuPremier Soccer League (PSL) athola imali yawo ngokubhadala kwababukeli abangena enkundleni.
KoBulawayo amaqembu adlalela kuPSL abalisa iChicken Inn, iHighlanders, iBulawayo Chief’s leBulawayo City.
Ikhansili iyabhadalisa ukusetshenziswa kwenkundla zayo njalo ihlephuna okuthile ekhulwini kumali etholwa ngamaqembu.
Amaqembu ayethula isikhalazo kuqula lezemali ekhansili, ecela ukuphiwa imvumo yokuthi asebenzise inkundla mahala.
IHighlanders yiyo eyaqala ukubeka isicelo sayo kodwa ikhansili yacina isithe lamanye amaqembu kuzamele ancediswe.
Ikhansili income ukuphatheka kweHighlanders ukubambisana lomphakathi ekulwiseni iCovid-19. IHighlanders yasungula umkhankaso wokudingela isibhedlela seKusileni imali njengoba kwabikwa ukuthi sizakwamukela labo ababanjwe iCorona.
“Loba inyathelo lekhansili lingasoke lisize kakhulu, liyisitshengiselo sokuthi ikhansili ifuna ukusiza iqembu,” kutsho ihofisi kanobhala wekhansili.
Amaqembu athe asalinde ukutshelwa yikhansili anduba akhulume ngaloludaba.
Online Reporter