Vusumuzi Dube
IKHANSILI yakoBulawayo (BCC) isiphakamise ukuthi umuntu wonke ozatholakala elahla amanzi egcekeni uzahlawuliswa i-US$200, lanxa ivuma ukuthi izambuzi zomphakathi ziyasilela edolobheni, ikakhulu ku-5th Avenue, lapho osekunuka phu khona.
Inhlawulo le iyingxenye yohlelo olutsha lwezinhlawulo ikhansili elucubungulayo.
Kubikwa labo abazabonakala bephosela izibi phansi emgwaqweni bazabhadaliswa i-US$50 kuthi labo abazabonakala belahlela izibi endaweni ezingavunyelwayo bona bazahlawuliswa iUS$100.
Inhlawulo zamacala la, zibekwe ngemva kokuba amakhansila eveze ukukhathazeka kwawo ngokulahlwa kwengcekeza lokulahlwa kwamanzi, lokunye okubangela ingcekeza ezindaweni zomphakathi edolobheni.
Ukhansila uDumisani Nkomo uthe izinhlawulo zamacala zibekwe ku US$50 kulabo abalahla ingcekeza emgwaqweni, iUS$100 kulabo abalahla izibi endaweni ezingavunyelwayo, kuthi labo abalahla amanzi egcekeni bazahlawuliswa i-US$200.
Uthe njengekhansili bacela abezitolo kabafake amagabha ezibi endaweni zabo, kodwa isicelo lesi kasilandelwanga.
“Imithetho kayisalandelwa edolobheni. Zonke izihlahla edolobheni zilahlelwa amanzi kunye lezinye indawo ziyangcoliswa,” kutsho uNkomo.
USodolobho wakoBulawayo uSenatha David Coltart uveze ukuthi ukusilela kwezambuzi zomphakathi ngezinye zezizatho ezenza abantu bacine bengcolisa idolobho.
Umbiko wekhansili uthe: “USodolobho uSenetha David Coltart uphawule ngokusilela kwezambuzi edolobheni, ikakhulu ku-5th Avenue. Lokhu kwenza ukuthi abantu bacine bengcolisa indawo zomphakathi.”
Isinqumo sokuthi kuqiniswe imithetho yokujezisa abangcolisa idolobho kuzasiza ngesikhathi idolobho libhekane njalo lodubo lokusilela kwempahla yokuhlanza idolobho.
Njengesibonelo, amakhansila aveze ukuthi uWard 7, osukela eMzilikazi isiyafika eSizinda njalo ehlanganisa leRenkini Rural Bus Terminus, kudingeka ukuthi kwengezwe izisebenzi zokuthanyela ezintathu.
Iwadi le, ilezisebenzi ezithanyelayo ezingu-15 kuphela lanxa kulengcekeza enengi ebakhona endaweni yeRenkini.
Ikhansili ithe izakhangela lokhu kunye lemali ekhona kubhajethi.
