Online Reporter
SESISIYAWUGQIBA umnyaka ka2025, nanko sekusele inyanga ezimbili nje ukuba siwuvalelise umnyaka. Kunengi okwenzakeleyo empilweni zethu kanye lasesizweni sakithi.
Kunhlangothi ezehlukeneyo zempilo zethu sithuthukile kodwa siphinde njalo sahlangana lobunzima obehlukeneyo obutshiye impilo zethu zihlakazekile.
Phakathi kwakho konke lokhu abadala bathi akulahlwa mbeleko ngokufelwa, kungabe kunzima lapho esikhona kodwa-ke ithemba kalibulali kungakho sithemba kuzakuba ngcono ngokuya kwesikhathi.
Inengi lezizalwane zakuleli sezilinde ngamehlo abomvu ukuvalelisa umnyaka lo obunzima njalo sikhangelele okungcono kulo umnyaka obuyayo.
Izisebenzi zamankampani ehlukeneyo, abazisebenzayo kanye lezikahulumende ziphakathi kobunzima ngoba imali eseziyihola isiyingcosana nje ngenxa kokukhwezwa kwentengo yempahla ehlukeneyo elizweni.
Lanxa isimo sisibi, kuhle ukuba sikhangele phambili siqinisele sonke nje ngezizalwane zakuleli sisebenze gadalala umkhonomi welizwe lethu uvuselelwe. Ubuhlungu esibuzwayo khathesi ngobesikhatshanyana nje buyedlula.
Bufana nje lowesifazana ohelelwayo oba phakathi kobuhlungu obukhulu ngesikhathi ebeletha kodwa obumane buphele nxa esephethe usane lwakhe. Yikho kanye okumele sikubekezelele ngoba yibuhlungu obedlulayo.
Ubunzima lobu yisisekelo sokulunga komkhonomi welizwe lethu. UMphathintambo wogatsha olubona ngokusetshenziswa kwemali uhlezi ebopha amabhawudo ngokwehlisa indleko zokusetshenziswa kwemali. Wacaca njalo ukuthi kumele kubenzima njalo buhlungu ngaphambi kokuthi umkhonomi wethu ulunge.
Kuyafana ke lathi njengezizalwane zakuleli ngoba kude lapho esivela khona yikho nje kumele sisebenzisane labakhokheli bethu silungise ilizwe lethu.
Singalibali ukuthi inhloso kaMkhokheli wethu yikuthi kusiyafika umnyaka ka2030 umkhonomi wethu ube usuyi- middle income economy.
Kungakho-ke lanxa siphakathi kobunzima singalibali lapho esiyakhona ngoba lanxa indlela ilameva izancentwa ibenhle ihambeke futhi.
Sibonga isisekelo esesifakwe okuzama ukuqeda ubugwelegwele elizweni, imizamo yokuthuthukisa inhlangothi ezehlukeneyo ezifana lezakhiwo, imigwaqo, ukusungulwa kwamaphurojekithi atshiyeneyo, ukuncediswa kwabalimi, ukwehliswa kwendleko zebhanga, imali zokusungulwa kwamabhizimusi ehlukeneyo ngenhloso yokuthi izizalwane zakuleli zithole imisebenzi kanye lokudla.
Inqobe isisele kithi njengabantwana besizwe seZimbabwe ukuthi sibambisane silandele umkhokheli wethu singaze savumela abantu bebulala umkhonomi welizwe lethu ngokuphatheka kubugwelegwele.
Sonke nxa singaba lombono wokuthuthukisa ilizwe, sizaphumelela ekucineni.
