adminKearabiloe Nare
Inhlanganiso yeLivestock Production Development ikhuthaza abalimi ukuba baqale ukusungula amaphurojekithi okufuya ezinye izifuyo amatsha anjengokufuya inkukhu, ingulube, izimvu angafuni amanzi lokudla okunengi njengokufuya inkomo.
UMnunzana Cosmas Muzunde onguLivestock Production Officer uveze lokhu ngesikhathi esithi ngenxa yendlala esibhahile njalo esibulele isifuyo eMatabeleland North, abalimi bangakhangeleli kakhulu ekufuyeni inkomo ngoba zingacina zicuba kumbe zibulawa yindlala ngenxa yokuswelakala kwezulu.
UMnu Muzunde ukhuthaze abalimi ukuthi njengoba kukhanya kungela zulu lonyaka baqale ukuthengisa izifuyo zabo kusesemasinyane ngoba kuzafika isikhathi sokuthi ziyabe sezehlile intengo ngenxa yokucuba okubangelwa yikuswelakala kokudla lamanzi okungenza bacine belahlekelwa yinzuzo.
Uqhubekele phambili echaza ukuba abalimi kumele bathengise izifuyo zabo ukuze basebenzise leyo nzuzo ukuqala amanye amaphurojekithi angadingi ukudla lamanzi amanengi.
“Abalimi bangathengisa ezinye inkomo zabo baqalise amanye amaphurojekithi okufuya ezinye izifuyo ezinjengezimvu, inkukhu lengulube kumbe amanye amabhizimusi angaphathelananga lokwezifuyo.
“Ukusungula amanye amaphurojekithi angaphanjaniswa kangako ngumumo womkhathi kungcono ngoba umumo womkhathi ulakho ukuguquka ungabi yilokho abantu abakwejayeleyo,” kuchaza uMnu Muzunde.
UMnu Muzende wengezelele wathi abangafuni ukuthengisa inkomo kumbe abalenkomo esezicubile balakho ukukhulumisana lamabhanga abo baboleke imali yokuthi bazithengele ukudla.
“Kungenzeka babekhona abangafuni ukuthengisa izifuyo zabo, labo balimi balakho ukukhulumisana lamabhanga abo baboleke imali ukuze bathengele izifuyo zabo ukudla.”
Ubuye waxwayisa ukuthi lanxa kuvamile ngesikhathi sendlala ukuthi abantu badingele izifuyo zabo amanye amadlelo kumele ngaphambi kokuthi balagise lezo zifuyo bakhulumisane labe-verterinary ukuze baphathiswe ngamacebo okuvikela izifuyo zabo kumikhuhlane elakho ukuhlasela izifuyo zabo kumadlelo amatsha.
Online Reporter